INI A/S-ip inissiaatai arlallit isaterneqassapput

Inissiat arlallit nutarsarnissaannut isaternissaannulluunniit INI A/S suliassaqangaatsiarpoq.

Ineqarnermut naalakkersuisup Karl-Frederik Danielsenip demokraatineersumut Justus Hansenimut akissuteqaataani atuarneqarsinnaavoq inissiat katillugit 115-it nutarsarneqarnissaat isaterneqarnissaalluunniit siunertaralugu 2019-imi attartortinneqarunnaarsimasut.

Inissiat attartortittakkat pineqartut illoqarfinni ukunaniipput:

• Ilulissani attartortittakkat: 27-it
• Aasianni attartortittakkat: 19-it
• Sisimiuni attartortittakkat: 23-it, taakku nutarterneqarnerat naammassippat atorneqaqqilissapput
• Maniitsumi attartortittakkat: 46-it

Illuutit illusimasoqanngitsut arlallit

Inissialli suli amerlanerusut 2019 sioqqullugu attartortinneqarunnaarsimapput. Inissiat attartortittakkat qasserpiaanersut maanna ilisimaneqanngillat, INI A/S IT-mut atortutigut periaatsimut allamut ikaarsaarnerata kingunerisaanik, inissiat qassiuinersut paasiniassagaanni nalunaarsukkanik qarasaasiakkut saqqummersitsisoqarsinnaanngimmat, taamaattorli paasissutissat atortorissaaruteqarani tiguneqarsinnaasut.

Illuutilli inissiallit katillugit 29-it 2019 sioqqullugu attartortinneqartarunnaarsimapput:

• Nuuk: Illuut 1
• Maniitsoq: Illuutit tallimat
• Qaqortoq: Illuutit tallimat
• Narsaq: Illuutit sisamat
• Nanortalik: Illuutit pingasut
• Paamiut: Illuut ataaseq
• Aasiaat: Illuutit tallimat
• Qasigiannguit: Illuutit marluk
• lIulissat: Illuutit pingasut

Illuutit taakku nutarsarneqanngikkuni aamma isaterneqartussaapput.

Inissiat arlallit attartortoqanngitsut

Ineqarnermut naalakkersuisoq ilisimatitsivoq inissiat attartortittakkat allat januarip qiteqqunnerani aamma attartortinneqanngitsut. Tamassumunnga pissutaasut assigiinngillat.

- INI A/S paasissutissiivoq, Namminersorlutik Oqartussat illuutaasa inoqannginnerannut nutarterineq, oqoqartunik suliarinninneq, attartortitsiniarnerup ajornakusoornera imaluunniit illuummik piginnittup isaterinissamut imaluunniit nutarterinissamut isummernissaata utaqqineqarnera, pingaartumik pissutaasut. Pingaartumik Kommune Kujallermi aamma Paamiuni attartortittakkat arlallit isaterneqartussaapput, Karl-Frederik Danielsen Justus Hansenip paragraf 37 atorlugu apeqquteqaataanut akissuteqarluni ilisiamtitsivoq.

Inissiat illoqarfinni ukunaniipput:

• Uummannami attartortittakkat: 1
• llulissani attartortittakkat: 5
• Qasigiannguani attartortittakkat: 11
• Aasianni attartortittakkat: 8
• Sisimiuni attartortittakkat: 21
• Maniitsumi attartortittakkat: 38
• Nanortalimmi attartortittakkat: 3
• Narsami attartortittakkat: 16
• Qaqortumi attartortittakkat: 72
• Nuummi attartortittakkat: 108
• Paamiuni attartortittakkat: 101