Ingerlatsisoq: - Hashimik tuniniaasoqartarnera toqqortersinnaanngilarput

Kristian Balslevip imerniartarfiit Kristinemut, Minimutten aamma Tullemut ingerlatsisuata oqaatsit atorneqartartut sakkortusinnaasarnerat paasisinnaavaa, kisianni imerniartarfinnit allanit allaanerusinnaanngitsoq isumaqarpoq.

Nuummi imerniartarfiit Kristinemut, Minimutten aamma Tullemut ingerlatsisuat, Kristian Balslev taama oqaluttuarpoq.

Imigassamik aalakoornartortalimmik tuniniaasinnaanermut akuersissut nutaaq tunniunneqassappat, piumasaqaatit nutaat arlallit naammassineqaqqaarnissaannik piumasaqartoqarnerata kingorna taama oqarpoq.

Kristian Balslevip imerniartarfiit 1. august 2019-imili ingerlappai.

Imerniartarfiit tusaamanerlunneqartartut nalunngilaa, kisianni Kristian Balslevip ingerlatsisunngorneraniilli – nammineq oqarnera naapertorlugu – pitsanngorsaaniartoqarsimavoq. Ilaatigut nakkutilliinermut atortunut 150.000 koruuninik akilinnik politiinit atorneqarsinnaasunik aningaasaliisoqarsimasoq ilaatigut nassuiarpaa.

- Sumiiffinni 16-ini assigiinngitsuni nakkutilliissuteqarpugut, arlaleriarlutalu videonik politiinut tunniussisarput, taanna oqarpoq.

Matulerisut ilinniarsimasut

Taamaammallu Kristian Balslev ilaatigut tupigusuppoq.

Imigassamik aalakoornartortalimmik tuniniaasinnaanermut akuersissuteqarnissamut piumasaqaatit ilagaat, sumiiffimmi pinerluuteqartoqartarnera ukkatarineqartariaqartoq, politiit tamanna tusarniaanermut akissuteqaatiminni oqaatigaat, illumi nakkutilliinermit, pujortartarfimmit aamma isertarfimmit immiussanik politiit sulinerannut iluaqutaasussamik tunniussisariaqarnerarlugit.

- Politiit usb-stikinik qanoq amerlatigisunik pereersimanersut naluara. Maannakkorpiaq suliat marluk ingerlasut pillugit usb-stikinik marlunnik uninngasoqarpoq, Kristian Balslev oqarpoq.

Persuttaaniarnerit ininilu allani akornusersuinerit akerlilersorniarlugit unitsinniarlugillu matulerisoqarnissaq aaqqiagiinngitsunillu aaqqiinissaq imerniartarfinni ukkatarineqarnissaat, aappaattut piumasarineqarpoq. Assersuutigalugu matulerisunik ilinniartitsinikkut imaluunniit ilinniarsimasunik matulerisoqarnikkut.

Kristian Balslevip kommunip piumasaqaatai ataqqivai, kisianni imerniartarfiit ingerlatani kisimik taamatut malitassaqartariaqarnerat paasisinnaanngilaa.

- Ilinniartitsisumik akileerusuppugut (matulerisunik ilinniartitsinissamut, aaqq.). Kisianni uagut kisitta saniatigut aningaasartuuteqarnissamik piumasaqarfigineqarutta, taava imerniartarfinnut allanut sanilliullugu nalunaarutiginnittoqarsimaneranik sanilliussititserusuppunga, taanna oqarpoq, nangillunilu:

- Allanut ajorpoq, kisianni uagut kisitta taamatut pineqannginnissarput piumasarissavara.

Imigassamik aalakoornartortalimmik akuersissut ataasiakkaatut suliarineqartartoq, kommuni ilisimatitsivoq, imerniartarfinnullu assigiinngitsunik piumasaqartoqartoq.

Isersimasartutoqqat

Kommunip imigassamik aalakoornartortalimmik tuniniaasinnaanermut akuersissummut piumasaqaatinik sukaterineranut, imerniartarfik Tullemut pissutaasinnaasoq, ingerlatsisup nassuiarpaa.

- Imerniartarfik sakkortuujuvoq. Hashimik tuniniaasoqartarnera isertuussinnaanngilarput, kisianni ersarissumik pisanngilaq. Paasisaasinnaallutik nalunngilaat.

Toqqissisimanannginnera paasisinnaaviuk?

- Sumiiffinnut allanut sanilliullugu pissusilersortarneq sakkortunerulaarpoq, kisianni ornissallugu imaanngilaq toqqissisimananngitsoq. Isersimasartutoqaanngikkaanni immaqa taamatut misinnarsinnaavoq.

Tullemutimi sisamanngornikkut unammiuaartoqartarnerata saniatigut, Kristinemutimi (Mutten) sapaatip-akunnerata ingerlanerani assigiinngitsunik aaqqissuiffiusartoq, Kristian Balslev ilisimatitsivoq, bingortitsineq, karaoke imaluunniit nipilersortoqarneq.

- Tamakkorpassuit aaqqissuunneqartarput. Nakuuserfiulluni pinerluffiullunilu toqqissisimananngitsuusimappat, taama inunnit assigiinngitsorpassuarnit ornigarneqartarsimassanngikkaluarpoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS