Ingerlatseqatigiiffinnik aqutsilluarnissamut najoqqutassiat nutarterneqassapput
Ingerlatseqatigiiffit Namminersorlutik Oqartussanit pigineqartut, ingerlatseqatigiiffinnik aqutsilluarnissamut najoqqutassiami immikkoortut ilaanni allannguisoqarnissaa qilaanaarisinnaavaat.
Sermitsiaq.AG-imi poorskikkunni allaaserisani nangeqattaartuni, suliffeqarfiit namminersorlutik oqartussanit pigineqartut ingerlatseqatigiiffinnik aqutsilluarnissamut najoqqutassiat ukiunik arfineq-marlunnik pisoqaassusilinnut assigiinngitsorujussuarmik malinnittarnernerat qulaajarneqarpoq, taanna ilaatigut ammasuunissamik aamma kukkusumik oqaluuserinnittoqannginnissaanik pilersitsinissamik siunertaqarpoq.
Naalakkersuisut Siulittaasuata Naalakkersuisoqarfianit akissuteqaat tunuliaqutaralugu ingerlatseqatigiiffiit ilaat pisortat akissarsiaannut aamma atorfeqarnerannut tunngasut ersarinnerusumik nalunaaruteqartoqartarnissaa piumaneqarpasippoq.
- Ingerlatseqatigiiffinni annerusumik minnerusumilluunniit ingerlatseqatigiiffinnik aqutsilluarnissamut najoqqutassianit nikingasuni, ingerlatseqatigiiffiup aaqqissuussaasumik oqaloqatigineqarnerini ingerlatseqatigiiffiit aqutsisuisa aamma Naalakkersuisup Siulittaasuata Naalakkersuisoqarfiata akornanni ingerlanneqartartumi qaqinneqassapput, naalakkersuisoqarfik Sermitsiaq.AG-mut mailikkut allappoq.
Naapertuinissamut piumasaqaat
- Najoqqutassiat aamma ingerlatseqatigiiffiit ataasiakkaat tamarmik akornanni suleriaatsimik naapertuinissaat soorunami anguniagaavoq, tamanna oqaatigineqarpoq.
Najoqqutassiat 2012-imi atuutilersinneqarput, ingerlatseqatigiiffiullu ataasiinnaap – Tele Greenland – najoqqutassiaq maleqqissaarlugu naammassisaraa takussutissaqarpoq.
Misissorneqassasoq
Najoqqutassiaq ukiunik arfineq-marlunnik pisoqaassusoqartoq misissorneqartariaqartoq, Naalakkersuisut Siulittaasuata Naalakkersuisoqarfia isumaqarpoq.
- Taamaattumik najoqqutassiap misissorneqarnissaa aamma nutarterneqarnissaa aalajangiunneqarpoq, najoqqutassiat atuutiinnarnissaat aamma uppernartuunissaat qulakkeerniarlugu, Naalakkersuisut Siulittaasuata Naalakkersuisoqarfia ilisimatitsivoq.
Naalakkersuisut Siulittaasuata Naalakkersuisoqarfiani siulersuisunut allattoqarfiup ukiup naannginnerani najoqqutassiat iluarsineqarsimasut namminersorlutik oqartussat ingerlatseqatigiiffiinut nassiunneqarnissaat pilersaarutaavoq.