Ingerlatseqatigiiffik peqquserluuteqarnermut suliami atornerlugaanerartoq
NAFWA, Kalaallit Nunaannit imermik avammut nioqquteqarniartoq, piaarinaatsoornikkut annertuumik peqquserluttuliornermut ilanngutsinneqarsimalluni oqarpoq
Eqqartuussissuserisoq Johan Schlüter ingerlatseqatigiiffimmik NAFWA S.M.B.A.-mik, Kalaallit Nunaannit imermik sermimeersumik nioqquteqarniartumik piginneqataanikuunngisaannarpoq. Ingerlatseqatigiiffiup siulersuisunut siulittaasua, Jan Richard, Sermitsiaq.AG-mut taama oqarpoq.
Taamaattumik ingerlatseqatigiiffiup taaguutaa Johan Schlüterip suleqatigisimasaasalu Susanne Frylandip aamma Lars Halgreenip annertuumik peqquserluttuliornerinut atatillugu taagorneqarnera nuanninngilaq.
- Suliamut tassunga attuumassussiligaanermut uagutsinnut ajorluinnarpoq, Jan Richard oqarpoq.
- Inuit peqquserluttuliortutut isigaatigut, naak piaarinaatsoornerinnakkut tamatumunnga ilanngunneqaraluarluta.
Schlüter eqqartuussissuserisutut atoraat
Taakku eqqartuussissuserisut pingasut Producentforeningenimut 115 millionit koruuninik peqqusersaarsimasutut unnerluutigineqarput. Unnerluussisussaatitaasut naapertorlugit kimigiiserfigineqaleramik, ingerlatseqatigiiffinnut aapparisami aqqinut allaqqasunut piginneqataassutiginerakkatik nuunniarsarigaluarsimavaat. Kisianni NAFWA S.M.B.A.-mi piginneqataanikuunngisaannarput, Jan Richard, unnerluussisussaatitaasunut ilisimannittutut aggertussaq naqissusiivoq.
- Soorunami unnerluussisussaatitaasut sapinngisarput tamaat ikiussavagut.
Tassami S.M.B.A.-mik immikkut ingerlatseqatigiiffiup ilusilersugaanera siunertaavoq, piginneqataanani peqataasoqartarpoq. Ilaasortat nutaat tamarmik siulersuisunit akuerineqaqqaartussaapput, tamanna Erhvervstyrelsenimi maleruagassami atuarneqarsinnaavoq. Illuanik ilaalerniaraanni akiliuteqartoqarnissaanik pisariaqartitsisoqanngilaq.
- Johan Schlüter siulersuisunit peqataasussatut akuerineqarnikuunngisaannarpoq, Jan Richard oqarpoq.
Suliaq 2012-imi aallartippoq, tassani NAFWA inatsisitigut ikiorneqarniarluni Johan Schlüterimut saaffiginnippoq. Tassanilu aamma eqqartuussissuserisoq 100.000 koruuninik akiliilluni tassunga ilanngunnissaa oqaluuserineqarpoq.
- Piffissami tassani siulersuisut taassuma ilanngutsinnissaanut soqutiginnipput, eqqartuussissuserisutut piginnaasaqarnera pillugu. Kisianni taakku 100.000 koruunit 2012-imi akilinngilai, tamatumalu kingorna allamik pisoqanngilaq, Jan Richard, nassuiaavoq.
Taamaattorli 2015-imi 100.000 koruuninik Johan Schlüter akiliuteqariasaarpoq. Aningaasat Registrering Danmarkimeerput, taakku Producentforeningenip piginnittuuneranik aningaasat aqutaraat. Akiliuteqarnermut suna tunuliaqutaanersoq takuneqarsinnaanngilaq, kisianni siulersuisut Johan Schlüterip maanna NAFWA-mut ilanngukkusulerneratut tamanna paasivaat.
Schlüter ilaatikkusukkunnaaraat
- Kisianni piffissami tassani siulersuisut taanna peqataatinnissaanut soqutigisaqarunnaareerput, Jan Richard oqarpoq.
- Sooruna?
- Piffissami tassani Frankrigimi taassumunnga suliamik ingerlatsisoqarmat, siulersuisunilu aamma ilanngutsinneqarnissaanut nangaassuteqartoqarmat.
- Taanna peqataasussatut kissaatiginagu, Schlüter nalunaarfigivisiuk?
- Taamaaliorsimanissarput qularutigaara.
Piginneqataassut tuniniaarniaraa
Tamatuma kingorna Jan Richard eqqartuussissuserisut ilaannit, Lars Halgreenimit mailinnappoq, piginneqataassut 100.000 koruuninik nalilik akiliutigineqartussaagaluartoq maanna ingerlatseqatigiiffinnut nutaanut, eqqartuussissuserisut aapparisaannit pigineqartunut nuunneqalersut.
Taakku piginneqataassutigineqartutut oqaatigineqartut, 210 millionit koruunilerlugit kingorna nioqqutissiortunut utertillugit akiliutigeriarpaat. Københavnip eqqartuussivianit Politikenip aamma Jyllands-Postenip nalunaarutaannit atuarneqarsinnaapput.
- S.M.B.A.-mi piginneqataassutsit tuniniarneqarsinnaanngillat, Jan Richard oqarpoq.
Susanne Fryland aamma Johan Schlüter tunisinissap ilimanassusaat annikitsuararsuusoq eqqartuussivimmi nassuiarpaat, imermik suliniut taama ittoq suli aallartinneqanngimmat.
NAFWA-p pitsaanngitsumik maluginiarneqarneq pinngitsoorusussimagaluarlugu, Jan Richard oqarpoq. Kisianni tamatuma saniatigut suliniummut isumalluartorujussuullutik oqaatigaa.
- Ingerlarsorpugut, pisisartunngorsinnaasunik aamma aningaasaliisinnaasunut pitsaasumik attaveqarpugut.