Ingerlatseqatigiiffik Nuutoqqami allamik sanaartornissamik qinnuteqartoq

Nutoqqami siusinnerusukkut suliniutigineqarsimasut innuttaasunit akerlerineqartarput, tamannalumi aamma qanittukkut pivoq, tassani unnuisarfeqarlunilu ullaakkorsiortarfeqartumik, saqqummersitsiveqartumik neriniartarfeqartumillu sanaartornissamik siunnersuut Kommuneqarfik Sermersuumit tusarniaassutigineqarmat akerliusoqarluni.

Innuttaasut ilaatigut Nuutoqqami illut amerlineqarnissaannut akerliullutik atsiornernik katersisimapput.

Maanna politikkeri suliffeqarfiutilillu Kuno Fencker suliniummik nutaamik saqqummiussisimavoq, nammineq isummani malillugu Nuummi innuttaasunit akueriuminarnerusussamik.

Taassuma oqaluttuaraa, ingerlatseqatigiiffik Nuutoqaq Invest Islandimiunit pigineqartoq suleqatigalugu ukiuni kingullerni pingasuni suliniut piareersarsimallugu.

"Nuutoqaq tamanut"

Nuummi suliffeqarfik Qarsoq Tegnestue "Nuutoqaq tamanut" qulequtsiullugu sanaartugassamik titartaasimavoq.

- Suliniummi sissaq sinerlugu pisuttuartarfik qajanik kulturikkullu ilisarnaatinik takusassaqarfigalugu atorneqartarnissaa siunertaavoq. Illutassaa saqqummersitsivittalimmik neriniartarfeqassaaq, Kalaallit Nunaanni entreprenørit immikkut sanaanimminik tuniniaaffigisinnaasaannik. Illutaa aamma isersimaartarfeqassaaq, eqqissilluni neriffiullunilu kaffisorfiusinnaasumik, Kuno Fenckeri Sermitsiaq.AG-mut oqaluttuarpoq.

- Illup qullersaa inersuartaqassaaq kulturikkut sammisassaqarfiusinnaasumik, qaqqajunnallu eqqaani illutaq aallarnisaasartunut atugassiaassalluni, aallarnisaasartut tassani nioqquteqarsinnaassallutik. Aamma pinnguartarfittaqassaaq, Kuno Fenckeri oqarpoq.

Kuno Fenckerip oqaluttuaraa, unnuisarfeqarlunilu ullaakkorsiortarfittalimmik, saqqummersitsivittalimmik neriniartartarfittalimmillu sanaartornissamik qinnuteqaammik kommunip tusarniaassuteqarneranut atatillugu suliniutissatut siunnersuut nassiussimallugu. Taamatummi ittunik tusarniaasoqarneranut atatillugu suliniutissatut allatut siunnersuummik nassiussisoqarsinnaammat.

Killilimmik biilinik ingerlaffiusassasoq

- Isumaqarpunga siunnersuuterput innuttaasunit akueriuminarnerussasoq, najukkamimi aallarnisaasartut ineriartorfigisinnaammassuk. Aamma Nuummi suut amigaataanersut uagut nalunnginnatsigu - tassalu meeqqat peqatigalugi eqqissilluni seqinnisaarfiusinnaasoq, Kuno Fenckeri oqarpoq.

- Sanaartorfiginiagarput aamma najukkami innuttaasunuinnaq atuutissanngilaq, kikkunnulli tamanut atuutissalluni - tassa takornarianut tikeraanullu aamma atuutissaaq - tassa pisoqqat ataqqillugit kulturikkut assigiinngisitaartumik atuiffiusinnaassalluni, taanna oqarpoq. Ilanngullugu erseqqissaassutigaa, sanaartugassatut siunnersuut naapertorlugu sumiiffimmi biilinik angallattoqarnerulissanngitsoq, suliniuteqarnermilu siunertarineqartoq, ilisimasaqarnerulernissaq aamma Kalaallit Nunaanni suliffeqarfiit inuiaqatigiinni suliffissanik pilersitsisartut akileraarutitigullu isaatitsisartut tapersersorneqarnissaat.

- Nuutoqqap avatangiisaa eriagisassaavoq paarialluagassarput. Pilersaarusiaq biilit uninngasarfissaanik arfineq-pingasuinnarnik inissaqartitsivoq. Biilinik angallanneq annikinnerpaaffianiissaaq kiffartuussinikkut pitsorluttunullu / innarluutilinnullu kisimi innersuunneqassalluni. Angallanneq pisuinnarnut cykel-ertut pingaarnertut aallaaviussaaq, siunnersuummi allassimavoq.

Piumasaqaatit malillugit nalilersorneqassasoq

Kommuneqarfik Sermersuumit ilisimatitsissutigineqarpoq, tusarniaanermut atatillugu siunnersuutigineqartut allat piumasaqaatit arlallit malillugit nalilersorneqassasut.

Taamaalilluni maanna tusarniaassutigineqartumut akissutigineqartut suliarineqarnerat naammassillugit suliarneqartussanngorpata suliniuteqarlutik pilersaarusiorsimasut marluk imminnut unammisussanngorput.

Kommunimi ilisimatitsissutigineqarpoq, uku piumasaqaataasut:

• Qinnuteqartup piginnaasai / tassunga ilanngullugu siunnersuuteqartup suliniutinik ineriartortitsinermi misilittagai (suliaqarnermi)
• Titartakkap pitsaassusaa – avatangiisinut, sanaartukkap ilusaanut illutassanullu ataqatigiinnera
• Najukkami innuttaasunut iluaqutaassasoq - pitsaassutsit atuutereersut annertusitillugit / annikillisillugit sumiiffillu nutaanik periarfissaqartilerlugu
• Pinngortitami assigiinngisitaarneq silamullu naleqqussarneq - ass. uumassusillit assigiinngisitaarnerat, illoqarfiup inissaqartitsinera aputillu aattarneranik isumaginnissinnaaneq
• Inuit ataatsimoorfigisinnaasaat - peqqissarfittut atorneqarsinnaasoq
• Atortut – silamut mingutsitsinngitsumik aaqqiissuteqarneq, teknologit mingutsitsinngitsut il. il.
• Angallaffit mingutsitsinngitsut – pisuinnarnut aqqutit/ sikkilertarfiit il. il.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...