Ingerlatseqatigiiffik nutaaq sulisussarsiornermut ikiuuttassaaq
Kalaallit Nunanni sulisussaaleqinerujussuup kinguneranik kalaallit islandimiullu suliffeqarfiutaat ataatsimut suliffissarsiuussisarfimmik nutaamik pilersitsipput
Xploration Services Greenlandip (XS), Kalaallit Nunaanni aatsitassarsiortunik kiffartuussisarnermi immikkut ilisimasallip, aamma Islandimiut suliffeqarfiutaata, Handafl, nunanit tamalaanit sulisussarsiornermik misilittagallip ingerlatseqatigiiffik Arctic Works pilersippaat.
- Arctic Worksimik pilersitsinermi, XS-ip najukkani attaveqaatai aamma kalaallinik sulisussarsartarnermik misilittagarnera aamma Handafl-ip nunani tamalaani attaveqaatai nunalilu allaneersunik sulisussarsiortarnermi ilisimasaqarnera pillugit tusagassiorfinnut nalunaaruteqarnermi allassimavoq, septembarip 18-ani Hotel Hans Egedemi ammaanersiorluni ilasseqatigiinnermi Aatsitassanut Suliffeqarnermullu Naalakkersuisoq Erik Jensen ammaanersiorluni oqalugiassasoq.
Ineriartortitsinermi periusissiat ilaat
Martin Sandy Shalmi, siulersuisunut siulittaasoq XS-imillu pilersitsisoq, imatut oqarpoq:
- XS-ip Arctic Worksimik pilersitsinermigut ineriartortitsinermi periusissiaq annertooq, kingullermik 2018-imi akuerisarput piviusunngortinniarlugu siullermeerluni annertuumik alloriarpoq. Tunngaviusumik piginnaasavut tunngavigalugit nunat tamalaat suliffeqarfissuannik Kalallit Nunaanni ineriartortitsisussamik aningaasatigullu isaatitsisussamik pilersitsissaagut.
Ingerlatseqatigiiffiup nutaap sanaartornerup aatsitassarsiornerullu iluini ilinniagaqanngitsunik ilinniagalinnillu sulisussarsiortarneq aallutarissavaa aamma avataanit sulisussarsiortoqartinnagu Kalaallit Nunaanni suliffeqarfiit sulisinnaasunik sulisoqarnersut ingerlaavartumik misissuiffigisassavai.
Ingerlatseriaaseq atorneqartussaq taartaasartunik aaqqissuussinertut ingerlanneqassaaq, tassa sulisussarsiarineqartut suliffigisimasaattut nalunaarsukkat aallaavigalugit sullitat ingerlaavartumik akiliutigisartagassaat naatsorsorneqartassapput. Ingerlatseqatigiiffik nutaaq isumaqarpoq, taamatut ingerlatsisarnikkut ilimanaateqarnerusoq suliffeqarfinnut sulisussanik nutaanik pisariaqartitsisunut iluaqutaasumik sivisunerusumik sulisoqartalersinnaassasoq.
Isertitat Kalaallit Nunaanni akileraaruserneqartassapput
- Kalaallit Nunaanni suliffeqarfittut pisussaaffigaarput, Kalaallit Nunaata sapinngisamik amerlasuunik suliassaqartarnissaa isertitaqartarnissaalu. Arctic Works aqqutigalugu sulisussarsisarnikkut, sulisussarsinermi isertitat tamarmik Kalaallit Nunaanni akileraaruserneqartassapput. Ingerlatseqatigiiffimmit sullitanut neqeroorutigineqarput akikinnerusumik sulisussarsiorsinnaaneq inuiaqatigiillu aningaasaqarnerannut tapiissuteqarsinnaaneq, Bent Olsvig Jensen XS-imi pisortaq ingerlatseqatigiiffimmilu nutaami pisortaagallartoq oqarpoq.