Amerikamiut sakkutooqarfianni Pituffimmi suliassat arlalippassuit isumagineqartarnissaat piffissami sivisuumi isumaqatiginninniutigineqareerlutik isumaqatigiissuteqarfigineqarput. Isumaqatigiissut nalinginnaasumik kiffartuussinissamut isumaqatigiissutitut taaneqartartoq, amerikamiut suliffeqarfiutaata Vectrusip 2013-imili pissarsiarimmagu assortuussutaasimaqaaq.

Kalaallit Nunaannit Danmarkimillu ingerlatseqatigiiffimmut kalaallinit pigineqartumut utertinneqarnissaa taamanikkullu sorsuutigineqalerpoq.

USA-p ambassadeqarfianit arfininngornermi ullaakkut nalunaarutigineqarpoq, Amerikamiut isumaqatigiissut ingerlatseqatigiiffimmut Inuksuk A/S-imut tunniussimagaat.

Piginneqatigiissutigineqartoq

Ingerlatseqatigiiffik Permagreen Grønland A/S-ip 51%-imik aamma Vectrus Services Greenland APS-ip 49%-imik pigisaraat.

Ambassadeqarfimmit ilisimatitsissutigineqarpoq, aserfallatsaaliinissamik isumaqatigiissut 'USA-p aamma Kunngeqarfiup Danmarkip isumaqatigiissutai naleqquttumillu aaqqiivigerusutaat' naapertorlugit suliarineqarsimasoq. 

Tassani pineqannguatsiarpoq, Danmarkip, USA-p Kalaallillu Nunaata 2020-mi oktobarip qaammataani kiffartuussinissamut isumaqatigiissummik nutaamik tunniussinissamut sinaakkutissanik isumaqatigiissuteqarsimanerat.

Ukiuni arlaqartuni saqitsaassutaasimasoq

Isumaqatigiissut ukiuni aqqaneq-marlunni atuuttussanngortinneqarpoq, sakkutooqarfiullu ingerlanneqarnissaanut aserfallatsaaliorneqarnissaanullu annerpaamik 3,95 milliarder dollarsinik naleqarluni.

Tassa 27,8 milliarder koruuninik naleqarluni.

Kingullermik 2013-imi kiffartuussinissamik isumaqatigiissuteqarnissamut neqeroortitsisoqarpoq, tamannalu Kalaallit Nunaata, Danmarkik USA-llu akornanni attaveqatigiittarnerup ukiorpaalunni ajornartorsiutaalerneranik kinguneqarpoq, amerikamiut suliffeqarfiutaat Vectrus isumaqatigiissuteqarfigineqarmat. Kalaallit Nunaanni isumaqatigiissutip Vectrusimut tunniunneqarnera akerlerineqarsimavoq, tassani Namminersorlutik Oqartussat amerikamiut nunatsinniinnerannit aningasatigut iluanaaruteqartarnerannut akorngusiimmat.

Ambassaseqarfik naapertorlugu, naatsorsuutaavoq Inuksuk A/S-ip kiffartuussinermi suliat siulliit 2023-p aallartinnerani aallartissagai, suliallu tamakkiisumik 2023-mi oktobarip aallaqqaataani tigussagai.