Ingerlatseqatigiiffiit pingasut EU-mit Nunatsinni aalisarput
Ingerlatseqatigiiffissuit aalisartut marluk Hollandimit Islandimiillu aamma danskit ingerlatseqatigiiffiat ataaseq, Kalaallit Nunaanni EU-p aalisakkanik pisassiissutaannik annermik piginnittuusut, Sermitsiap ullumikkut saqqummiuppaa. Ingerlatseqatigiiffiit aalisarneruniarlutik kimigiiserput.
Nunani tamalaani aalisarnerup eqiterunneqarnikuunera amerlasuunut tupaallaatissaanngilaq. Kisianni aviisip Sermitsiap saqqummiussaa inuit ilaannut tupaallaataasinnaavoq.
Kalaallit Nunaata eqqaani aalisarneq europamiut ingerlatseqatigiiffiinut amerlanngitsunut niuerfiuvoq iluanaarfiusoq, taakku EU-p aalisarnermi pisassiissutaanik pingaartumik kinguppannik, saarullinnik, suluppaakkanik qaleralinnillu pissarsilluartarput.
EU-p umiarsuaatai kilisaatit tunisassiorfiit, Kalaallit Nunaata eqqaani pisassiissutinik pisariaqartitsisut, ilaatigut danskit, tyskit, hollandimiut franskillu soqutigisallit peqatigalugit Kalaallit Nunaata eqqaani aalisarnerunissamik, taamaalillunilu pisassiissutinik amerlanernik pissarsiniarlutik kimigiiserput.
Aqutsisut
Hollandimiut aamma islandimiut ingerlatseqatigiiffissui kiisalu danskit umiarsuaatileqatigiiffiat kilisaatinik tunisassiorfinnik qulit missaanniittunik pigisaqarput, taakku ukioq manna EU-mut pisassiissutinut Kalaallit Nunaata killeqarfiani aningaasaqarnikkut akisussaaffiusumi akuersissuteqarput.
Tamanna europamiut umiarsuaataannik, ukiuni arlalinni nunatsinni aalisarnermut peqataasimasuni, piginnittunik Sermitsiap misissuinerata takutippaa.
Hollandimiut umiarsuaatileqatigiiffissuat Parlevliet & van der Plas aamma islandimiut umiarsuaatileqatigiiffissuat Samherji, ilaqutariinnit amerlanngitsunit pigineqarlutillu aqunneqarput, danskit/franskit ingerlatseqatigiiffiat Ocean Tiger Kristian Barslund Jensenimit aqunneqarpoq. Taanna Bornholmimi ingerlatseqatigiiffissuarmi umiarsuaatileqatigiiffimmi Ocean Prawnsimi pisortaanerullunilu piginneqataavoq, kilisaatinut tallimanut Atlantikup avannaata imartaani allami kinguppannik qaleralinnillu aalisartartunik piginneqataasoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: