mittarfiit
Ingerlatseqatigiiffiit aningaasaajarnissaannut siunnersuisoqatigiit aarlerisaaripput
Naalakkersuisut namminneq 2,1 milliarder koruuninik, imaluunniit mittarfiit nutaat akissaasa affaat sinnerlugit, nassaarniassapput. Tamanna isumatusaartuuvoq missingersuusiortarnermullu inatsimmut naapertuulluni, kisianni Namminersorlutik Oqartussat suliffeqarfiutaannik aningaasaajaanissaq mianersuussiuk, Torben M. Andersen oqarpoq
Inatsisartut aningaasanut inatsisissaq ataasinngornermi isummersorfigivaat, tassanilu ilaatigut allassimalluni, Naalakkersuisut Kalaallit Airportsimut 2,1 milliard koruuninik, mittarfiliortiternerit akissaasa affaat sinnerlugit, aningaasaliissuteqarumasut.
Aningaasarpassuit taakku Aningaasanut Inatsit naapertorlugu assigiinngitsorpassuarnit nassaarineqassapput, ilaatigut Sanaartugassanut Iluarsagassanullu Aningaasaateqarfimmit, piginneqataassutinik tunisinikkut, nunatta karsiata naatsorsuutaani sinneqartoorutinit, sanaartugassatut suliniutinit atuinikinnerunermit kiisalu soraarnerussutisiaqalernissamut aaqqissuussinerit PFA Soraarnermi pilersinneqarsimasut atorunnaarsinneqarnerannit iluanaarutissatutit naatsorsuutigineqartunit.
Tamatuma saniatigut immikkut ittumik inatsisiliortoqassaaq mittarfiliortiternermi nunanit allanit suliartortut akileraarutaasa kommunit avaqqutiinnarlugit nunatta karsianut toqqaannartumik ingerlatinneqassutigisassaannik.
Taava aamma suliffeqarfiit Namminersorlutik Oqartussanit pigineqartut, pingaartumik Tele Greenland aamma Royal Greenland, aningaasanik assersuutigalugu akinik appaanissamut tunisinermiluunniit akinik qaffaanissamut atuinermut taarsiullugu immikkut ittumik agguagarsisitsisarnissamik kaammattorneqassapput.
Taarsigassarsiarineqartussatut pisariaqartinneqartut taamaalillutik »taamaallaat« 1,6 milliarder koruuniussapput, Danske Bankimut piffissami aggersumi pissarsiariniarneqartussanngortinneqarsimasut.
Pisortat namminersortullu suleqatigiinnissaannik siusinnerusukkut siunnersuutigineqartoq, namminersortut sanaartorfigisaat akerlianillu attartornermut atuisullu akiliutaannik piumasaqarfigisassaat sussakkeerluinnarneqarsimavoq. AG taama allappoq.
- Namminerlu annertuumik aningaasaliissuteqarnissaq ajunngilaq, Kalaallit Nunaata Aningasaqarneranut Siunnersuisoqatigiit siulittaasuat Torben M. Andersen oqarpoq. Tamannami inatsisit malissagaanni pisariaqarpoq.
- Aningaasalersuinissamut aningaasaleeqataassutinik pissarsiniartoqartussanngorpoq, taavalu aningaasat suminngaanniit pissarsiarineqarsinnaanerat assigiinngitsunik qimerluuinikkut misissorneqarluni. Aningaasat amerlavallaat tiguneqarnersut imaluunniit tamanna ajunnginnersoq nalilersoruminaappoq. Suliffeqarfiit qanoq aqunneqarnissaannut qanorlu aningaasaqarnikkut patajaallisaavigineqarnissaannut tunngavissanik suliaqarluni aallartissimagaluaraanni silatusaarnerussagaluarpoq. Arlaannik suugaluarnersumik pisoqarsinnaanera tunngavigalugu tunngavissanik pingaarnernik ataasiakkaanullu atuuttunik, Torben M. Andersen oqarpoq
Torben M. Andersenip suliniummik AG-mi naliliinera atuaruk, taanna uani ataani linki atorlugu pisiarisinnaavat: