Ingerlariaqqiffiusumik ilinniarnermik naammassinnittut amerleriarput
Ilinniarnermut tunngatillugu ajunngitsumik ingerlasoqarpoq, kisitsisit nutaat tamanna takutippaat.
Inuusuttut amerlanerusut ingerlariaqqiffiusumik ilinniarnermik naammassinnipput.
2006-miilli amerlassusaat 99 procentinik qaffariarsimapput, Naatsorsueqqissaartarfimmit kisitsisit tamanna takutippaat.
2022-mi ingerlariaqqiffiusumik ilinniarnermik naammassinnissimasut 251-inik amerlassuseqarput. Taakkunannga 71 procentit Kalaallit Nunaanni naammassinnissimapput.
Ingerlariaqqiffiusumik ilinniagallit akornanni amerlanerpaat professionsbacheloritut ilinniagaqarput, ikittuinnaallu kandidatitut ilinniarlutik naammassisartut. Ineriartornerulli takutippaa kandidatitut naammassisartut amerlatsikkiartortut.
Ilinniartut amerleriartut
2022-mi kandidatitut ilinniarsimasut 32-upput, 2006-2022-mut sanilliullugu agguaqatigiissinnerini amerlanerupput piffissami tassani kandidatitut ukiumut agguaqatigiissillugu naammassisartut 27-iupput. Kandidatitut ilinniartut amerlanerpaartaat Kalaallit Nunaata avataani ilinniartarput.
2022-mi ilinniartut ingerlariaqqiffiusumik ilinniarnermik ingerlatsisut 1.214-upput. Taakkunannga 826-t Kalaallit Nunaanni ilinniartuupput, 352-illu nunani allani ilinniartuullutik.
2006-imut sanilliullugu ilinniakkamik ingerlatsisut amerlassusaat 2022-mi 52 procentimik qaffasinnerupput. Kalaallit Nunaanni ingerlariaqqiffiusumik iliniakkanik ingerlatsisartut qaffariaataat annertunerpaavoq, Naatsorsueqqissaartarfik ilisimatitsivoq.
2015-imi ingerlariaqqiffiusumik ilinniakkamik aallartitsisimasut amerlanerpaasimapput, 2022-llu tungaanut 13 procentimik apparsimavoq. Ukiup ataatsip ingerlanerani Kalaallit Nunaanni ingerlariaqqiffiusumik ilinniakkamik aallartitsisimasut amerlassusaat 12 procentimik appariarsimavoq, nunanili allani aallartitsisimasut 45 procentimik qaffariarsimallutik.