Ingerlaaqatigiinneq: Meeqqat toqqissisimanatik innartassanngillat
Kalaallit Nunaanni meeqqat akornanni kinguaassiutitigut kannguttaatsuliortarnerit aamma imminut toquttarnerit sammineqartinniarlugit, pingasunngorpat tulliani Københavnimi ingerlaaqatigiittoqassaaq.
Maanna nunami politikkikkut eqqissiviilliortoqarnerani meeqqat puigorneqassanngillat. Københavnimi ingerlaaqatigiinnissamut suliniuteqartut taama isumaqarput.
- Qanoq ililluta inissisimanerlutsigileratta, Kalaallit Nunaanni meeqqat amerliartuinnartut kinguaassiutitigut atornerlunneqartarpat, inuusuttorpassuillu imminut toqunnissamik aalajangertarput, meeraanerminnit atornerlugaallutillu sumiginnagaasaramik – iliuuseqartoqarnanilu? Pisussamut Facebookimi qaaqqusissummi tamanna oqaatigineqarpoq.
- Pisoq politikkikkut klovnit takutitsinerattut pivoq – tamannalu piffissami kingullermi politikerit aamma atorfilittat tunniutiinnarnerinik kignuneqarpoq. Tusagassiorfiit aqqutigalugu tatisimaneqarnermut akiuussinnaajunnaarlutik unneqqarillutik ersarissumik oqaluttuarput, nangillutik taama allapput.
Eqqugaasut eqqaaniarneqarniartut
Suliniut nammineq suliniutaavoq, taanna Chris Christophersenip aamma Ellen Svendsenip aaqqissuussaraat.
- Kalaallini inuiaqatigiinni pisorpassuit tunuliaqutaralugit, meeqqat kinguaassiutitigut atornerlugaasut aamma imminut toquttarnerit inuusuttunit oqitsorsiorfigineqartalerneranni, ingerlaaqatigiinnissamik ’Meeqqat toqqissisimanatik innartassanngillat’ qulequtaralugu ingerlaaqatigiititsiniarpugut – tassani Danmarkip sinnerani takuneqarnissarput aamma tusaarneqarnissarput siunertaralugu. Politiinit akuersissuteqarfigineqareerluta Christiansborg Slotspladsimit Christianshavns Torvimut malunnartitsinissamut ersarissaanissamut piareersimavugut, tassani ataatsimoorluta eqqugaasut qanigisaasullu eqqaaniassavagut, taakku tusagassiuutinut nalunaarummi allapput.
Ingerlaaqatigiinneq pingasunngornermi juunip 19-anni nalunaaqutaq 19-mit 21-mut pissaaq. IA-p Folketingimut ilaasortaatitaa Aaja Chemnitz Larsen aaqqissuussami peqataassaaq.