Inga Dora: - Uternissaq aalajangersimavara

Inga Dora Markusseni 2014-miilli Reykjavikimi Nunat Avannarliit Siunnersuisoqatigiivini allaattaanertut atorfeqarsimavoq. Qaammatillu naanerani suliunnaassaaq. Taanna Royal Greenlandimi ilinniartitaanermut pisortatut atorfinissaaq, taamaasilluni uini meeqqatillu sisamat Nunatsinnut angerlaqatigissavai.

Nunatsinniillu qimaasunik oqallinnermi taanna qeqqanut inissippot. Robert Holmenip saqqummersitaanut qisuariaateqarluni allagaqarsimavoq, akuersitilluguli allataa tamakkiisoq saqqummersipparput:

Aamma atuaruk: - Nuuttartut amerlapput - nunamit inissisimaneq taama ajortigaa?

'Peqqinnissaqarfimmi atuarfeqarfimmilu ajornartorsiuteqaraluaqisoq uternissaq aalajangiussimavara. Suna Islandimi qimannerlugu ilisimavara, aamma suna uterfiginerlugu ilismavara. Nunatsinni avissaartuunnerujussuaq, ajoratali 'pissusilersornerput' tupigusuutigaara. Eqqartuinerit oqaloqatigiinnermiit toqqissisimanarnerutikkatsigit. Ingerlalluartut akuerisinnaannginnatsigit, nuannersunillu eqqartuiffissaraluami tujorminartunik eqqartuerusuppallaarnersuaq.

Aamma atuaruk: Kalaallit 4.000-t ukiut 20-t ingerlanerini aallassapput

Eqqarsataaseq taanna nukinnik atuiffiullunili qasusaataavoq. Kiap "pissakilliorluni" misigisimanngilaa. Aningaasaqarnikkut pissakilliorneq innuttulluunniit pissakilliorneq. Sapaatit akunneri tulliuttunut nerisassaqarniarluni ilungersortuarneq illuatungaanilu akit qaffakkiartuinnavissut. Tamanna soorunami aamma nukillalaarsaataasarpoq. Naak Nunatta najoruminartuunissaanik takorluukkat. Naak Nunatta akikinnerulernissaanik siunnersuutit. Naak "suleqatigiilluta ingerlasariaqarnerput" pillugit takorluukkat.

Aamma atuaruk: - Nuummiit Nuuppunga, uteqqinnaviannginnera qularnanngilaq

Inuiaqatigiit iluatsittunik erseqqissaaneq ajortut inuiattulli kinaassusitsinnik eqqaasitsiuartut, tarnikkut piitsuupput. Sapiinnerusariaqarpugut annikitsumillu iluatsitagut pillugit immitsinnut eqqaasittarluta.

Teknikkip ineriartornerani periarfissaanilli atorluarneqarlutillu aaqqiissuteqarfigisassat marluupput. Nunap atortulersornera pingaarutilik siunissatsinnut sunniuteqangaatsiarpoq. Tamanna Inatsisartunut qinersilerutta eqqaamassavarput. Tamanna oqallisigisiuk.

Najukkani ataatsimoorneq kikkulli tamarmik 'ikioqatigiittarnerat', soorlu illoqarfimmi meeqqanik perorsaaqataasarnerit atorunnaariartorput. Ullumikkut ingerlanerluffimmi "aaqqissuussaanermik" pissuteqarpoq. Aammalu! Eqqaamallugu, inuunerput ajunnginnerpaamik atornissaa inuttut ataasiakkaatut akisussaaffigingatsigit, taamatulli iliorsinnaannaanngikkaanni ingerlariaqqinnissamut aaqqiissummik nassaarniartariaqarpoq.'