Inga Dora ineqarnermut tunngasoq pillugu: Siunertamut naapertuutinngilaq

Borgmesterip Kommuneqarfik Sermersuup suliffeqarfinnut namminersortunut inissianik attartoriarluni innuttaasunut attartortitseqqiisarnera pillugu suliami ingerlatsivik tatigivallaarlugulu illuatungiliuttut mianersoqqusinerat tusaasimanngilaa.

Inga Dora G. Markussenip (S) Kommuninut Nakkutilliisoqarfiup marlunngornermi aalajangiinermini Kommuneqarfik Sermersooq inatsimmik avaqqutsisimasutut unnerluutigimmagu tupaallaatigivallaanngilaa.

Taanna isumaqarpoq, borgmesteriusartut ingerlatsivimmut upperinnippallaartarsimasut aamma kommunip innuttaasut inissarsitinniarlugit immikkut iliuuseqarsimanera pillugu politikkikkut ernummateqarsimanermut tusarnaartarsimanngitsut.

- Ingerlatsinermi ileqqorissaartoqartussaavoq, matumanilu taama pisoqarsimanngilaq. Periuserineqartoq taanna kommunalbestyrelsip siuliisa isornartorsioraangassuk illuatungiliuttut isornartorsiuinerat pimoorunneqartarsimanngilaq, Inga Dora G. Makurssen Kommuneqarfik Sermersuumi Aningaasaqarnermut Inuussutissarsiornermullu Ataatsimiititami ilaasortaasoq oqarpoq.

Politikeri suliaq borgmesterimut Charlotte Ludvigsenimut qanoq kinguneqartinneqassanersoq nammineq qanoq isumaqarnini pillugu maannakkorpiaq oqaaseqarusunngilaq, maqaasinerarpaali borgmesterip akisussaaffini tigullugu suliami kukkusoqarsimaneranik nassuerutiginninnissaa:

- Akisussaaffik inissinneqartariaqartoq

- Tamanna ilungersunarluinnartutut isigivarput, inatsisinillu unioqqutitsilluni iliuuserineqarsimasoq akuersaarsinnaanatigut. Politikkikkut akisussaaffiliisoqartariaqarpoq, Inga Dora G. Markussen oqarpoq.

Kommuninut Nakkutilliisoqarfiup kommunimi borgmesteri ingerlatsivillu namminersortut inissiaataannik attartornissaq politikkikkut akuerineqarnissaanik qulakkeerinnissimanngitsutut sakkortuumik isornartorsiorpai.

Kommunimi aqutsisunit borgmesteritullu paarlaassimasunit tunngavilersuutigineqarsimavoq, inissanik amigaateqarnerujussuup aaqqiiffigineqarnissaa, periuserlu atorneqarsimasoq malillugu ukiualunnguit ingerlaneranni inissanik 416-inik nutaanik pissarsisoqarsimasoq.

Tamannali siunertamut naapertuutinngitsoq Inga Dora G. Markussenip oqaatigaa:

Namminersortutut aningaasaliissuteqartartut pinngitsoorneqarsinnaajunnaarsinnaanerat ernummatigineqartoq

- Ineqarnermut politikkimi kukkusoqarsimavoq, neriorsuuterpassuaqartoqarsimaneralu pissutigalugu inissiarpassuarnik sukkasuumik sanaartortoqarsimalluni. Namminersortutut aningaasaliissuteqartartut maanna pinngitsoorsinnaajunnaalerpavut, aningaasaliissuteqartartunullu taakkununnga aningaasarpassuarnik akiliuteqartussaalluta. Suliluunniimmi ileqqaangaqalersimanngilagut. Aningaasat akiliutigisavut uternavianngillat, Inga Dora G. Markussen kommunip najukkami aningaasaliissuteqartartunut sanasunulu isumaqatigiissutai pillugit oqarpoq.

Nuummimi inissaaleqisoqarnera ajornartorsiutigivinneqanginnami?

- Soorunami initaarnissamut utaqqisorpassuaqarnera ajuusaarnarpoq. Ajornartorsiut tamanna ukiorpassuarni atuussimavoq. Tamannali inerteqqutaasunik iliuuseqarnissamut tunngavilersuutigissallugu pitsaasuunngitsoq isumaqarpunga. Maannami 2.000-it initaarnissaminnik utaqqisut qanoq pineqassappat, Inga Dora G. Markussen aperivoq.

Isumaqatigiissutigineqarsimasut Kommuneqarfik Sermersuumut ukiut 30 millioner koruunit missaannik amigartoorutaasassasut, kisitsisit kommunip Kommuninut Nakkutilliisoqarfimmut nassiussimasaata takutippaat, kisitsisit nassiunneqarsimasut Sermitsiaq.AG-mit takuneqarsimapput.

Inga Dora G. Markussenittaaq suliaq saqqummiunneqarmalli kommunip iliuuserisimasai sakkortuumik isornartorsiorpai. Kommuni assersuutigalugu aaqqissuussamut illersuilluni aviisinut ilanngussisarsimavoq.

Akileraartarnermi?

- Borgmesterip oqaatigisimavaa, kommuni Nakkutilliisut suliaanni ajorsassappat, eqqartuussivitsigut suliaqartitsinissamut piareersimasoqartoq. Tamanna ajorluinnarpoq. Nammineq taakku nakkutilliisoraavut, taamatullu nalunaaruteqartoqarneratigut inuiaqatigiinni inuit inatsisitigut illersugaanerat ajorseriassaaq, taanna oqarpoq.

Inga Dora G. Markussen naapertorlugu, tatiginnittoqaqqilissappat kommunip ingerlanerani suli aaqqissugassaqartoq, qaammammili matumani kommunaldirektørimik nutaamik sulisoqarlernissaa eqqarsaatigalugu isumalluarnerarpoq.

Ineqarneq pillugu suliami aamma amerlanerusunik aaqqitassaqartoqartoq taanna isumaqarpoq. Assersuutigalugu Akileraartarnermut Aqutsisoqarfik suliamut akuliutissappat, attartortut inatsisitigut illersugaanerat ernummatiginerarpaa:

- Attartortummi ilaat allagarsippat allassimasumik, ineqarnerminut kommunimit ukiumut tusintilikkaanik toqqaannanngitsumik tapiiffigineqartarluni? Taakku taava akileraaruserneqassappat?, Inga Dora G. Markussen attartortut suliami pisuussuteqaratik ilanngunneqarsimasut erseqqissaasoq oqarpoq.

Powered by Labrador CMS