Inga Dora akiuussutissalersuinermi suliap iternga tikillugu misissorneqarnissaanik piumasaqartoq

Atorfilittap ataatsip borgmesterillu Charlotte Ludvigsenip akiuussutissalertikkiartorlutik utaqqisorpassuit qaangiinnarlugit akiuussutissalertissimanerat misissorneqassaaq.

Borgmesterip Charlotte Ludvigsenip (IA) sapaatip akunnerani kingullermi Nuummi akiuussutissalersuisoqarmat utaqqisorpassuit qaangiinnarlugit akiuussutissalertissimanera pillugu nutaarsiassaq saqqummiunneqartoq kommunalbestyrelsimi ilaasortap Inga Dora G. Markussenip (S) maanna qisuariarfigaa.

Inge Dora G. Markussenip kommunalbestyrelsimi Siumumi ilaasortat sinnerlugit piumasaraam sulia misissorneqassasoq:

- Siumumiit piumasarissavarput, pisimasup iternga tikillugu misissuiffigineqarnissaa. Imaalertariaqanngilarmi allaffissornermi A-nik B-nillu sulisoqassasoq, Inga Dora G.Markusen Siumut Nuup facebookiatigut allappoq.

Inga Dora G. Markussenip naammagisimaarpaa, borgmesterip iliuuserisimasaminut atatillugu utoqqatsernera, pitsaasumilli nalililiisinnaanngitsutut takutitsinerarlugu:

- Inuit ilaat misigisimapput immikkut pineqartariaqarlutik

- Borgmesteri utoqqatsernerminut ”likerneqarpoq”, allanilli siulliulluni kapitissinnaanerata takutippaa ajoraluartumik naliliisinnaanera pitsaanngitsuusoq. Matumani mianersoqqussut ikittaarsimasussaagaluarpoq; Salliuniarpunga pissutigalugu... Inga Dora G. Markussen allappoq.

Taassuma oqaatigaa, pissaanermik atornerluinerunersoq imaluunniit allaanersoq pingaarnerunngitsoq:

- Pisimasoq soorunami uissuumminarpoq, immikkoortitsisoqarpormi. Pissaanermik atornerluinerunersoq imaluunniit allaanersoq pingaarnerunngilaq. Inuit ilaat misigisimapput immikkut pineqartariaqarlutik aalajangersimasumi suliffeqarnertik ”peqqutigiinnarlugu”. Taamatut pisoqartussaanngilaq. Tamatta inatsisinut naligiippugut. Nakorsatut sulisut nalilertussaavaat salliusoqassanersoq, matumanilu salliusussaq borgmesteriusussaanngilaq, attorfilittaanngilluinnarlunilu, Inga Dora G. Markussen allappoq.

Powered by Labrador CMS