Inerniliussaagallartoq: Ikuallattoqarnerani pingasut ajunaarput
Ukkusissani tallimanngormat ikuallattoqarnerani inuit pingasut toqusut, politiit misissuinerisa takutippaat. Maannamuugallartoq ikuallattoqarnerani pinerluttoqarneranik takussutissaqanngilaq.
Ukkusissani sapaatip-akunnerata siuliani tallimanngornermi ikuallattoqarmat inuit pingasut toqupput. Maannamut misissuinerup tamanna takutippaa, Kalaallit Nunaanni Politiit tusagassiuutinut nalunaarummi taama allapput.
Najukkamit tusarfiit arlallit oqarnerat naapertorlugu ilaqutariinnguit pineqarput – arnaq, taassuma inooqataa aamma meeraat mikisoq.
Ajunaartut taakku pingasut tassaasut meeraq kiisalu arnaq angullu, Kalaallit Nunaanni Politiit Sermitsiaq.AG-mut uppernarsarpaat.
Ikuallattoqalernerani inuit arfinillit illumiipput. Inuit pingasut illumit annaanneqarput, putsumik ikuallattumillu ajoqusernerminnik katsorsarneqariartorlutik Nuummut aallarunneqarput. Taakku inuunerminnik navianartorsiunngillat.
Pinerluttoqarneranik takussutissaqanngilaq
Aallarunneqartut taakku pingasut ajunaartunut pingasunut qanoq attuumassuteqarnerat politiit oqaaseqarfigisinnaanngilaat, Sermitsiaq.AG-p paasissutissaatai naapertorlugit arnamut ajunaartumut angajoqqaajupput, kiisalu ernutaat.
Ikuallattoqarnerani pinerluttoqarneranik takussutissaqanngitsoq, politiit nangillutik ilisimatitsipput:
- Politiit suli annertuumik misissuipput, maannalu misissueqqissaarnissat utaqqillugit, nalunaarummi tamanna allaqqavoq.
Pingasunngornermi unnukkut ikuallattoqarneranik misissuisartut, toqusunik misissuisartorlu Danmarkimeersut Ukkusissanut tikissapput.