Inerisaanermut pisortaq nutaaq: Aningaasat sulissapput

Vækstfondenip pisortartaatavata nunatsinni inuussutissarsiornermi periarfissarpassuit takusinnaalereerpai. Pisortatut suliaa siulleq kuultisiorfimmut Nalunaq-mut tunngassuteqarpoq.

Vækstfondenip pisortartaava Rolf Kjærgaars pisortap allaffianut Hellerupimiittumut iserami suliassaa siulleq Kalaallit Nunaanneersuuvoq.

Vækstfondeimi Greenland Venturelu ulloq taannarpiaq avammut nalunaaruteqarsinnaalerput kuultisiorfimmut Nalunaq-mut 15 milliuunit koruuninik aningaasaleeqatigiissallutik.

Kujataani ineriartorneq

- Suliniut pissanganarluinnartuuvoq, Kujataanullu ineriartortitsisinnaallunilu suliffissaqartitsinerulissalluni, Kjærgaard isumaqarpoq. Taassuma Kalaallit Nunaat periarfissaqarluartutut isigaa.

- Inatsisit 2016-imi allanngortinneqarnerisa kingorna Vækstfonden Kalaallit Nunaanni suliaqarsinnaalerpoq. Taassuma kingorna suleqatissatsinnik arlalinnik pissarsivugut, inuussutissarsiuteqartunik attaveqarfitsinnik suliaqartunillu allanik ataatsimeeqateqartarluta.

- Kalaallit Nunaanni inuussutissarsiutit ineriartornissamut periarfissaqartorujussuupput – pingaartumik soorlu aatsitassarsiornerup, takornariaqarnerup aalisarnerullu iluani, suliffeqarfiimmi immikkut ilisimasaqarluartut taakkunaniipput ineriartortitseqataarusullutillu.

- Aammali niuernerup sanaartornerullu iluani ineriartortinneqarsinnaasunik suliffeqarfippassuaqartut eqqumaffigaarput. Pingaartumik mittarfissualiortiternissaq eqqarsaatigalugu sanaartornerup iluani suliffeqarfiit aningaasaliiffigineqarnissaminnik pisariaqartitsipput, sanaartungassat annertuut aallartinneqarsinnaaniassammata.

Ineriartornissamut aningaasaliissutit

Vækstfonden inuussutissarsiuteqartut annerulernissaannut aningaasanik atorniartitsinikkut, qularnaveeqqusiinikkut toqqaannartumillu aningaasaliinikkut ikiortarpai. Nalunami toqqaannartumik aningaasaliisoqarpoq. Mittarfissualiornissaq pillugu danskit naalagaaffiat isumaqatigiissuteqarfigineqarmat Vækstfonden Greenland Venture peqatigalugu 220 milliuunit koruuninik, Kalaallit Nunaanni atorneqartussanik, tapeeqataapput.

- Uagut suliassaraarput aningaasat sulitilernissaat, taamaasillutik suliffeqarfinnut inuiaqatigiinnullu naleqarnerulersitsissammata – taamaattoqaraangallu iluanaarutaasut aamma Vækstfondenimut utertarput, taakkulu atorlugit inuussutissarsiornermi suliniutit nutaat aningaasaliiffigisinnaasarpagut.

- Kinguaariinni nikittoqartarnera aamma suliffeqarfiit nutaanik sanaartornissaat pillugit immikkut ilisimasaqarneruvugut, Rolf Kjærgaard nassuiaavoq. Taassuma tikkuarpaa kalaallit suliffeqarfiutaat arlallit namminersortutut mikinerusutut ukiualuit matuma siorna aallartissimasut – taamaammallu kinguaariit nikinnissaat pisariaqarluinnalersoq.

Motzfeldt taarserpaa

Rolf Kjærgaardip Christian Motzfeldt taarserpaa, taanna ukiuni 18-ini kingullerni sulereerluni unissalluni nalunaarsimavoq. Kjærgaard Vækstfondenimi sulisooreerpoq, ukiuni sisamani kingullerni aningaasaliinermut tunngatillugu pisortaasimalluni, tassani Vækstfondenip suliaqarfii pingasut akisussaaffigisimallugit: VF Udlån, VF Fonde aamma VF Venture. Taassuma siuliani Rolf Kjærgaard EU-kommissionimi nunat tamalaat akornannut tunngatillugu immikkut ilisimasalittut sulisimavoq Inuussutissarsiornermullu ministeriaqarfimmi immikkut ittumik siunnersortiusimalluni.

Rolf Kjærgaard 48-nik ukioqarpoq, nuliani panitsillu 15-inik ukiulik Frederiksbergimi najugaqatigai.

Rolf Kjærgaard suli Kalaallit Nunaanniissimanngilaq:

- Tikissaqqaarpunga – qilanaarpungalu, pisortanngorlaaq oqarpoq.

Vækstfonden pillugu allaaserisaq aviisimi Sermitsiami atuarsinnaavat – aviisi uani ataani pissarsiarisinnaavat:

Powered by Labrador CMS