Sprogdebat
Ineqi: Tuluttoorneq qallunaatoornermit amerlanerusunik periarfissaqartitsivoq
Tillie Martinussenip (D) oqaatsit pillugit oqallinnermut isornartorsiuinera Sisumumit itigartinneqarpoq
Siumup tuluit oqaasii takornartat oqaasiini siullinngortinniarnerinut qallunaatuumit periarfissiinerujussuunera pissutaavoq.
- Meeqqat tuluttoornermut pikkorinnerulerpata Kalaallit Nunaannut iluaqutaassasoq, Siumumi isumaqarpugut. Tuluttut inuit 700 millionit attaveqarfigisinnaavagut, qallunaatut 6 millioniinnaat, Ineqi Kielsen, Siumumi ilinniarneq pillugu oqaaseqartartoq taama oqarpoq.
Tillie Martinussenip (D) isornartorsiutigisaa taassuma itigartippaa. Taanna isumaqarpoq, qallunaat oqaasii tuluillu oqaasii assigiisinneqartariaqartut.
Atuaruk: Tillie: Tuluttoorneq utaqqisilli
Nunat sanilit tuluttoorput
Ineqi Kielsen illuanik isumaqarpoq, tuluit oqaasii meeqqat atuarfianni atuartut ilinniagassaanni takornartat oqaasiini qanoq salliutinneqalernissaannut pilersaarummik ersarissumik piareersaasoqassasoq. Taamaalilluni ilinniarnermut naalakkersuisup Nivi Olsenip (D) pilersaarut saqqummiussaa taperserpaa.
Atuaruk: Qallunaat oqaasii atorneqarpallaarunnaassapput
- Tuluttut attaveqaqatigiikkutta nunarsuaq mikinerulissaaq. Tamatuma nunat qaninnerpaat, soorlu Canada, Island aamma USA attaveqaqatiginerusinnaaneri kingunerissavaa, taanna oqarpoq.
Kalaallisut aaqqiissutit
Innuttaasut tuluttut oqalunnermut pikkorinnerulerpata aamma aningaasaqarnikkut iluaqutaassasoq taanna isumaqarpoq. Tillie Martinussenip aamma tuluttoorsinnaaneq nunarsuarmioqataanermi nukittoqutaasoq miserratiginngiaa. Kisianni tamanna qallunaatoornermut taarsiunnissaa isumassarsiatsialaanngitsoq isumaqarpoq.
Atuaruk: Siumut-ungdom: Det danske sprog hæmmer os
Taassuma saniatigut ukiut marluinnaat ingerlanerini tuluit oqaasii takornartat oqaasiitut siullertut eqqunneqarnissaat piviusorsiortuunngitsoq isumaqarpoq.
Ineqi Kielsenip piareersarluartoqaqqaarnissaanut isumaqataavoq, ukiullu marluk ingerlanerini anguneqarsinnaaneranut aalajangiusimanianngilaq. Tuluit oqaasii qallunaat oqaasiinut taarsiullugit oqaatsit takornartatut salliutitsinissamut, Kalaallit Nunaat nammineq tunngavissamik pilersitseqqaarnissaa tassunga pingaartuummat.
- Tuluit oqaasii takornartat oqaasiattut siullertut atulernissaannut piareersarluarnissarput pingaaruteqarpoq. Aaqqiissuummik ilaarsiinnassanngilagut. Atortussat ineriartortissavagut, taamaalilluni meeraq kalaaleq tuluttut ilinniarsinnaaniassammat.