Ineqi siulittaasup issiavianut maanna ingissinnaanngorpoq

Naalakkersuisut februaarip arfernani ataatsimiikkamik, Tunngaviusumik inatsisissaq pillugu Isumalioqatigiissitami siulittaasussatut Siumumit inassutigineqartoq akuerisimavaat.

Doris J. Jensen qaammatit marlussuit matuma siorna aalajangerpoq, qaammatini marluinnarni isumalioqatigiissitami siulittaasutut atuutereerluni tunuarniarluni, isumalioqatigiissitami ilaasortat politikkeritut qinigaasimasut aningaasarsiaqartinneqarnissaat iluatsinngitsoormat.

Eqqarsarfeqarneq

Siumumi siulersuisut piffissami sivisuumi eqqarsarfeqareerlutik aalajangerput, partiimi siunnersorti Ineqi Kielsen siulittaasussatut inassutigineqassasoq.

Inassuteqaat Naalakkersuisunit maanna inaarutaasumik akuerineqarpoq, isumalioqatigiissitarlu taamaalilluni politikkikkut aaqqiagiinngittoqartarnera pissutigalugu uninngasarsimasoq aallarteqqissinnaanngorpoq. Kingullermik siulittaasussamik nutaamik toqqaaniarnerup malitsigisaanik, politikkerit tunngaviusumik inatsisissamik suliaqarniarnerat qaammatit pingajuat avillugu kinguaattoorfiusimavoq.

Siumut partiit annersaattut isumalioqatigiissitami akerlerineqaqisumi kisimi siulittaasuutitaqarsinnaavoq.