Ineqi Kielseni ineqarnermut akigititanut appartitserusuttunut ilaliuppoq

Inatsisartuni ilaasortat nukarlersaat, 21-nik ukiulik Ineqi Kielsen, aamma parteeqatimisut Siumukkormiumeersutut Jess Svanetut isumaqarpoq ineqarnermut maanna akigitinneqartut qaffasippallaartut.

- Jess Svanep oqaaseqaataa isumaqatigaara, tassa ineqarnermut akigititat qaffasippallaartut. Taamaattumik ineqarnermut, sanaartornermut attaveqarnermullu naalakkersuisoq, Atassummeersoq Knud Kristiansen kajumissaarpara qanoq aamma qanoq annertutigisumik ineqarnermut akigititanik appartitsisinnaanerup paasiniarnissaanik.

Taama Ineqi Kielsen tusagassiuutinut nalunaaruteqarluni allappoq.

Atuaruk: Jess Svane ineqarnermut akiitsut pillugit isumasioqatigiittoqarnissaanut piumasaqarpoq

Siumukkormioqataa Jess Svane, Qaasuitsup Kommuniani kommunalbestyrelsimi ilaasortaallunilu aamma Inatsisartuni ilaasortaasoq, ininik attartornermut akigititat malunnaatilimmik appartinneqarnissaannut siorna siunnersuuteqarpoq ineqarnermut akiitsorilerneqarsimasut akiornissaat siunertaralugu. Marlunngornermilu aamma oqariartuuteqarpoq isuma suli taanna pigigini, Inip inaataani attartortut 398-it akiitsoqarnertik pissutigalugu anisinneqarnissaminnut navianartorsiortut saqqummiunneqareersorlu.

Parteeqataata, Qaasuitsup Kommuniani kommunalbestyrelsimi ilaasortap, Palle Jerimiassenip Jess Svanemut tapersersuinini pingasunngornermi nalunaarutigaa.

Atuaruk: Jess Svane parteeqatiminit taperserneqarpoq

Palle Jerimiassenimi isumaqarpoq piffissanngortoq attartornermut akigitat aamma kiassarnermut akigititat naliliiffigineqarnissaat, kiisalu pisortat attartortitsisutut, tassalu Namminersorlutik Oqartussat kiisalu kommuunit, attartortut ineqarnermut akigititamut tamakkiisumik nammassinnaatinnagit ineqarnermut tapiissutit isumaginninnermilu ikiorsiissutit aqqutigalugit tapiissuteqarneri.

Taakkualu parteeqataat Ineqi Kielseni allappoq nammineq aamma attartornermut akigitat appartinneqarnissaat tapersersorini kisitsisit ersersissappassuk tamanna innuttaasunut iluaqutaassasoq.

Jess Svanep attartornermut akigititat appartinneqarnissaannut kissaateqarnermi saniatigut attartortut akiitsui qaffakkaluttuinnartut pillugit isumasioqatigiittoqarnissaanik piumasaqarpoq.

Ineqarnermut allaaserisat allat uani atuakkit