Ineqarnermut suliaq pissutaalluni Naalakkersuisoq tunuartoq
Asii Chemnitz Narupip marlunngornermi nalunaarutigaa, ineqarnermut atatillugu suliaq Kommuneqarfik Sermersuumi borgmesteriunerata nalaani aallartinneqarsimasoq pillug Nakkutilliisut isornartorsiuinerat pissutigalugu Naalakkersuisutut tunuarluni.
Kommuneqarfik Sermersuumi inissaqartitsiniarnermi ingerlatseriaasiusimasoq Asii Chemnitz Narupip borgmesteriunerani atuussimasoq pillugu Nakkutilliisut qanittukkut sakkortuumik isornartorsiuipput.
- Nakkutilliisoqarfiup nalunaarusiaa uannik tatiginninnermik annertuumik aalassatitsisimarpasippoq. Periarfissamillu allamik takusaqarsinnaanngilanga taamaallaat tunuartariaqarninnit, borgmesteriusimasoq tusagassiorfinnut nalunaaruteqarluni oqarpoq.
Asii Chemnitz Narupip ilisimatitsissutigaa, Nakkutilliisoqarfiup nalunaarusiaanik, taamaasillunilu isornartorsiutinik imminut tunngasunik suli takusaqarsimanani, erseqqissaassutigaali borgmesteritut suliaqarsimanini Naalakkersuisut tusaamaneqarnerannut ajoqusiissanngitsoq.
- Suliaq ukiut arlallit matuma siornatigut, siusinnerusukkullu atorfigisimasamasa nalaani pisimasoq, naalakkersuisooqatigiit ingerlaannarnissaannut akornutaalersissinnaanngilara, Asii Chemnitz Narup oqarpoq.
Isornartorsiummi immikkuualuttortat ilisimanngikkai
Borgmesteriusimasulli tupigusuutigaa, tusagassiorfitsigut innuttaasulli sinneranit paasissutissat saniatigut allanik paasissutissinneqarsimannginnini.
- Kisianni soorunami eqqumeeqaaq Nakkutilliisoqarfiup aalajangerneranit takusatuara tassaammat tusagassiutinut nalunaarut. Paasissutissanik Nakkutilliisoqarfiup uannik sakkortuumik uparuaatiminut tunngavilersuutaanik pissarsinissannut suli periarfissaqartinneqarsimanngilanga – taamaattumillu imminut illersussalluni
ajornarluinnarsimavoq imaluunniit paasiniassallugu isornartorsiutit eqqortuunersut
kukkusuunersulluunniit, Asii Chemnitz Narup oqarpoq.
Erseqqissaassutigaa, kommunimi politikkerit ingerlatsinermi pisussaaffigineqartutut ilaatinneqartarsimasut suli isumaqarami, isornartorsiutaasulli tunngavissaqassappata akisussaasuunini akuersaarnerarlugu.
Paasissutissanik pissarsinissani neriuutigigaa
- Isornartorsiuinerit eqqortuusimassappata, uangalu borgmesteriusimanerma nalaani
inatsisitigut kukkusumik tunngaveqarluni ingerlatsisoqarsimappat, aningaasaqarnermut ataatsimiititaliaq akuliuttittarnagu, taava tamanna ajuusaarutigaara aamma isornartorsiuinerit tusaatissatut tigussagikka. Taamaattoqarsimassappat uanga soorunami akisussaasuungama.
- Oqaatigiinnarsinnaavarali uanga qularutiginngilluinnarakku aalajangikkani tamani kommunimi aningaasaqarnermut ataatsimiititaliap peqataatinneqartarsimanera, aamma periuseq ingerlatarput inatsisitigut eqqortuusoq.
Asii Chemnitz Narupip suli neriuutigaa, Nakkutilliisoqarfiup isornartorsiuinermini tunngavigisimasaanik taamaalluni takusaqarnissani, isornartorsiutigineqarsimasut isummerfigisinnaaniarlugit.