Ineqarnermut suliaq kukkunersiuisoqarnermut advokateqarnermullu 2 mio. kr.-nik akeqartoq

Namminersorlutik Oqartussat Kommuneqarfik Sermersuullu advokatinut kukkunersiuisunullu kommunip ineqarnermut periusaa pillugu saqitsaannermi 2 millionit koruunit missaat atorpaat.

Kommuneqarfik Sermersuup ininik attartortitsinermut periusaanik nakkutilliinermik suliaq millioninik akeqarpoq.

Kommuni aamma Namminersorlutik Oqartussat katillugit 2.063.984,37 koruunit kukkunersiuisoqarnermut advokateqarnermullu suliamut atatillugu atorsimagaat, naatsorsuinernit allagaatit Sermitsiaq.AG-p pissarsiarisaasa takutippaat.

Namminersorlutik Oqartussat 496.584,37 koruuninik atuipput Kommuneqarfik Sermersoorlu 1.566.400,00 koruuninik atuivoq.

Avataanit ikiorneqarnermut akiliutit
Aningaasat taakku avataanit ikiorserneqarnerinnarmut akiliutigineqarput. Kommunimi Namminersorlutillu Oqartussani suliami sulisoqarnikkut akunnerit atorneqartut naatsorsorneqarsimanngillat.

Uani ataani tabelimi Namminersorlutik Oqartussat nakkutilliinerannit naatsorsuusiat takuneqarsinnaapput. Aningaasartuutit naatsorsuutinut nalunaarsorneqarsimanngitsut allattorsimaffimmi amigaataasut, nakkutilliisoqarfik allappoq:

Kommunip aningaasat amerlanerpaartaat aaqqiissummut illersuinermut ikiorserneqarnermut atorpai, tamannalu tabelimi uani ataani takuneqarsinnaavoq. Iluaqutaanngilarli, tassami kommuni Kommunit Nakkutilliisoqarfiannit sakkortuumik isornartorsiorneqarpoq, kiisalu innuttaasunut inissianik pissarsiniarnermi periuseq taanna atorneqassanngitsoq peqqussutigineqarluni.

Doris J. Jensen nutaanik apeqquteqarpoq
Suliap ingerlanerani Namminersorlutik Oqartussat kommunimut nakkutilliinerani, kommuni aaqqiissutip inatsisinut naapertuussusaanik advokatit illersuinermut allagaqarnissaannut aningaasanik atuivoq. Aaqqiisut naatsumik oqaatigalugu inissianik aningaasaliisartunut namminersortunut attartoriarluni inissiat amigartooruteqarfiusumik innuttaasunut inissiaatileqatigiiffiup Iseritip utaqqisunut allattorsimaffianniittunut attartortinneqartarput.

Illuanik Namminersorlutik Oqartussat Advokatfirmaet Poul Scmithimut inissianik attartortitsinermut periuseq nalilersortippaat. Kommunip periuseq taanna atorsinnaanngikkaa advokatit naliliipput, Kommunit Nakkutilliisoqarfiatalu tamanna tunngavigalugu aamma taama naliliisoqarpoq.

Kingullermi uani sapaatip-akunnerani Inatsisartunut ilaasortaq Doris J. Jensen (S) suliaq pillugu Naalakkersuisunut arlalinnik apeqquteqarpoq. Naalakkersuisut suliami nalunaaruteqartariaqartut, politikeri isumaqarpoq. Illoqarfiit pingaarnersaanni inissaaleqisoqarnera utoqqatsissutaasinnaanngitsoq, naalakkersuisoq Kirsten Fencker siornatigut oqaaseqarnikuuvoq. Kisianni naalakkersuisup oqarnera naapertorlugu, Naalakkersuisut suliap qanoq kinguneqarnissaanik aalajangiisuussapput.

Maannamut suliap ingerlateqqinneqarnissaanut aningaasanut inatsimmi 2 millionit koruuninik immikkoortitsisoqarpoq. Qanittukkut taarsiisoqarneranut atatillugu Nunamut Namminermut naalakkersuisoqarfik, kommuninut nakkutilliisoqarfiup inissisimaffia naalakkersuisumut Mimi Karlsenimut (IA) nuunneqarpoq.

Maannamut naalakkersuisoq Kirsten Fencker (N) tassani politikkikkut akisussaasuusimagaluarpoq, naalakkersuisuusimasoq aamma Kommuneqarfik Sermersuumi borgmesteriusimasoq, Asii Chemnitz Narup (IA) suliamut attuumassuteqarpallaarnera pissutigalugu.

Sermitsiaq.AG-p suliaq pillugu allaaserisat uani katersorpai.

Powered by Labrador CMS