Skip to main content

Ineqarnermut pilersaarut kommuninit itigartitsissutigineqartoq

Naalakkersuisut pisortat inissiaataannik ineqarnermut immikkoorortamut ataatsimoortitsinissamik pilersaaruteqarnerat, Naalakkersuinikkut Ataqatigiissarisoqatigiit sapaatip akunnerata siuliani Kangerlussuarmi ataatsimiimmata akerlilerneqarpoq

Namminersorlutik Oqartussat inissiaataasa kommuninut qanoq tunniunneqarnissaat pillugu pilersaarusiornissamut ukiuni sisamani isumaqatiginninniartoqareersoq, Naalakkersuisut februaarip aallartinnerani aalajangeriasaarput, ”Periarfissaq 1 malillugu, kommunit inissiaataat Namminersorlutillu Oqartussat inissiaataat ineqarnermut immikkoortortamut ataatsimoortinneqassasut.

Naalakkersuisulli pilersaarutaat, kommunit Namminersorlutillu Oqartussat martsip sisamaani siunissami ineqarnermut politikkissaq oqaluuserineqarmat: Inissianut ataatsimoortumik pilesaarut, itigartitsissutigineqarpoq. Tassani IA Siumullu sinnerlugit borgmesterit ataatsimoorlutik itigartitsipput.

Tassunga taarsiullugu suleqatigiissitanik pilersitsisoqassasoq aalajangiunneqarpoq, suleqatigiissitat saqqummiutissavaat, Namminersorlutik Oqartussat inissiaataat aserfallatsaaliinissamut milliarderpassuit nalingannut kinguaattooqqasut qanoq kommuninut tunniunneqarsinnaanersut.

Tunniussinissamut killissaliussaq

Nunami kommunit Namminersorlutik Oqartussat inissiataannik qaqugu tigusissanersut piffissalerneqarsimavq, tassalu 2022-mi januaarip aallaqqaataani.

 Qeqqata Kommuniani Siumut sinnerlugu borgmesterip Malik Berthelsenip allatut oqaluttoqalernera tikilluaqquaa, nuannaarutigaalu aalajanginneqarsimammat Namminersorlutik Oqartussat inissiaataasa kommuninut tunniunneqarnissaat, kommunimmi tassaammata inissaaleqinerup annernarsinnaaneranik ilisimasaqarnerpaat.

 Unammilligassarujussuaq

- Unammilligassarujussuaqarpugulli. Uagut kommunerput tassaavoq, inissiat aserfallatsaalineqarnissaannut tunngatillugu kinguaattoqannginnerpaaq. Tamatumunnga pissutaavoq, ineqarnermut akiliutinik ukiuni arlalinni 2 procentimik qaffaasarsimanerput, taamaalilluta aserfallatsaaliinissamut pisariaqartumut akissaqartitsiniarluta, Malik Berthelsen Sermitsiaq.AG-mut nassuiaavoq.

- Namminersorlutik Oqartussat inissiaatiminnik aserfallatsaalisimannginnerat pissutigalugu, kommunini akiligassarujussuarnik tigusissanngilagt. Akiligassarnermi kinguaariit tulliinut ingerlateqqissinnaanngilarput, Malik Berthelsen suleqatigiissitat unammilligassaat eqqarsaatigalugu erseqqissaavoq.

Eqqarsaatigisassarpassuit

Suleqatigiissitat nalilersuilerunik eqqarsaatigisassarpassuaqarput, suliaqarnerat ineqarnermut inatsimmik aamma inissianik aqutsinermi inatsisitigut atugassarititaasunik nutaanik kiisalu aningaasaqarnermik ingerlatsinermi kinguneqaatissanik aaqqiissuteqarnermik inerneqartariaqartoq.

Tassa ilaatigut ineqarnermut akiliutit qaffasissusissaat nalilersorneqassaaq, aserfallatsaalinnissamut kinguaatoorutit qanoq aaqqiiffigineqarsinnaanerat, kikkut pisortat inissiaataanni najugaqarsinnaatitaassanersut aamma sapinngisamik akikinnerpaamik qanoq aqutsisoqarsinnaanersoq nalilersorneqassapput.

Toqqammavik ajorluinnartoq

Naalakkersuisut aerfallatsaaliinissamut kinguaattoorutit namminneerlutik ”toqqammavittut ajorluinnartutut” taavaat.

Aserfallatsaaliugassat qanorpiaq katillugit akeqassanersut erseqqissumik oqaatiginissaannut Namminersorlutik Oqartussat eqqoqqissaartunik paasissutissaateqanngillat. Paasissutissalli pissarsiarineqarsinnaasut malillugit, nunami inissiarpassuit pisortanit pigineqartut naammaginartumik atugassanngussappata 2,6 milliarder koruunit aningaasaliissutigineqartariaqarput.

Aningaasanut tunngatillugi Naalakkersuisut isummernissamut tunngvissiorsimapput, taanna martsip sisamaani ataatsimiinnermi saqqummiunneqarpoq:

- Paasissutissat assigiinngitsumik naatsorsorneqarsimapput (kommunit Namminersorlutillu Oqartussat akornanni), taamalu nalorninarlutik, tamakkiisuunatik toqqaannartumillu sanillersuunneqarsinnaanatik. Ajortuutivulli minnerpaamik ataatsimik ikilipput, erseqqissaassutigalugu oqaatigineqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER