Ineqarneq pillugu suliaq: Siumut immikkut ittumik ataatsimeeqqusisoq

Ataatsimiititap tallimanngornermi ataatsimiinnerani Kommuneqarfik Sermersuumi politikkerit ineqarnermut tunngatillugu suliaat Nakkutilliisunit isornartorsiorneqarsimasoq oqaluuserineqarpoq.

Nakkutilliisut isornartorsiutaat pillugu ilisimatitsissut ataatsimiititami amerlanerussuteqartunit tusaatissatut tiguneqarpoq, Siumumiilli tamanna akerlerineqarpoq, suliarlu pillugu ikinnerussuteqartutut oqaaseqarfigineqarluni.

Ataatsimiititami ilaasortaapput:

Charlotte Ludvigsen (IA) Siulittaasoq

Justus Hansen (D) Siulittaasup tullia

Juaaka Lybert (IA)

Uju Petersen (IA)

Ken Madsen (N)

Martha Abelsen (S)

Inga Dora G. Markussen (S)

Kommunimit nakkutilliisut isornartorsiutaani 14-iusuni pingasut immikkut erseqqissaassutigineqaqqusimapput.

Matumani ilaatigut pineqarpoq ”Kommuneqarfik Sermersuup inissianik attartortitsinissaq siunertaralugu namminersortunik isumaqatigiissuteqarsimanera pillugut Nakkutilliisut isornartorsiutaat”, tassani Inissianik attartortitsisarneq pillugu Inatsisartut peqqussutaannut isornartorsiuineq qanoq attuumassuteqarnersoq kommunimit erseqqissaassutigeqquneqarsimalluni.

Isornartorsiut itisiliiffigeqquneqartoq

Kommunimit tamatuma saniatigut namminersortunit attartornermut aningaasartuutaasartut ineqarnermut akiliutinit annertunerunerat pillugu isornartorsiuisimaneq apeqquserneqarpoq.

- Tassunga atatillugu itisiliisoqarnissaa kissaatigineqarpoq, tunngavilersuisimanermimi inissialiortiterneq kommunimut akeqanngitsutut naatsorsuuteqarsimanermit tunngaveqarpasimmat. Kommuni inissialiortitsigaangat, kommuni piginnittutut kvadratmeterimut annerpaamik 15.000 koruunit nalingannut aningaasaliissutinit iluanaarutaasut 1,5 procentiinik piumasaqarsinnaavoq, tassa ukiumut kvadratmeterimut 225 kkoruunit nalingannik.

- Kommunip siusinnerusukkut suliniutaasarsimasunit nalunngilaa, aningaasaliissutinit iluanaarutaasartut kvadratmeterimut ukiumut 750 koruunit missaanniitartut.

Kommunimit erseqqissaaffigeqquneqarpoq, borgmesterip pisimasuni pingasuni aningaasaqarnermut ataatsimiititaq akuersiteqqaarnagu namminersortunut attartornissamik isumaqatigiissuteqartarsimanera pillugu Nakkutilliisut isornartorsiuinerminni ullut sorliit uppernarsaatillu sorliit pineqarnersut.

Kommunip suliamik suliaqaqqinnissaa

Suliaq kommunalbestyrelsip novembarip 23-ani ataatsimiinnissaani oqaluuserisassanngortinneqarsimavoq.

Siumumiilli tamanna naammanngitsoq isumaqarput. Suliaq immikkut ataatsimiissutigineqassasoq taakku kissaatigaat.

- Siumumit inassutigineqarpoq, Ineqarneq pillugu suliaq kisiat oqaluuserisassaralugu kommunalbestyrelsi immikkut ittumik ataatsimiissasoq. Nakkutilliisut aalajangiussaat suliamut atatillugu takussutissat ilanngullugit kommunalbestyrelsimut nutaamut saqqummiunneqartariaqarput, kommunalbestyrelsi suliamut ilungersunartumut kina akisussaasuunersoq aalajangiiniassammat.

Taperserneqanngitsut

Siunnersuulli tamanna marlunnit isumaqatigineqarluni tallimanilli isumaqatigineqarani itigartitsissutigineqarpoq, ataatsimiititamillu ilisimatitsissut tusaatissatut tiguneqarpoq, tassani Siumut sinnerlugu ilaasortat marluk ikinnerussuteqartutut oqaaseqartinneqarlutik.

Suliap suliarineqarnerani aamma kommunip suliamik isumaginnissimanera Siumumit isornartorsiorneqarpoq, oqaatigineqarluni suliamik saqqummiussutip ilaa kommunip nittartagaatigut innuttaasunut saqqummiunneqarsimasoq.

- Pitsaasumik ingerlatsinissaq malinneqarsimanngilaq, tassa kommunalbestyrelsip ulloq 5. marts 2020 matoqqasumik ataatsimiineranit inatsisitigut uppernarsaatit kommunnip nittartagaatigut Kommuni saqqummiussisimavoq, tassani Eqqartuussissuserisoqarfiup Poul Smithip suliamik qulaajaasimanera ilanngunneqarsimanani. Suliamut atatillugu isummeqqusisoqartillugu innuttaasut tamakkiisumik paasissutissinneqartuuppata pitsaasumik ingerlatsisoqarsimassangaluarpoq.