Ineqarneq pillugu suliaq: Politikkikkut akisussaaffik Inga-Dorap inissikkumavaa
Kommuneqarfik Sermersuumi kommunalbestyrelse ineqarneq pillugu suliamut tunngatillugu nakkutilliisoqarfiup aalajangiisimaneri pillugit ullumi immikkut ittumik ataatsimiigiaqquneqarpoq. Akisussaaffik borgmesterimiitinneqartariaqarpoq, Siumut sinnerlugu kommunalbestyrelsemi ilaasortaq isumaqarpoq.
Kommuneqarfik Sermersuumi kommunalbestyrelse ullumi tallimanngornermi 18. februar immikkut ittumik ataatsimiittussanngorput.
Ataatsimiinnermi namminersorlutik oqartussat Nakkutilliisoqarfiata aalajangiussaa pillugu ilisimatitsisoqassaaq. Aalajangiineq kommunip ineqarnermi attartortitsisarneranut tunngasuuvoq.
Kommunalbestyrelse aalajangiinermut tunngatillugu allagaatit tamaasa sisamanngornermi misissorsinnaasimavaat, atorfilittallu suliamut tunngatillugu apeqquteqarfigisinnaasimallugit.
Immikkut ittumik ataatsimiinneq ullumi nal. 12.00 aallartissaaq, akunnernillu pingasunik sivisussuseqartussatut naatsorsuunneqarluni.
Namminersorlutik Oqartussat nakkutilliisoqarfiat kommunip inissianik attartortakkanik attartoriarluni attartortitseqqiisarnera pillugu 23. november 2021 aalajangiimmat, kommunalbestyrelse nakkutilliisoqarfimmut piumasaqarpoq aalajangiinermut tunngavilersuutit tamaasa piumallugit. Taakkulu ippassaq immikkut ulloqartitsinermi sammineqarput.
Aalajangiinermi immikkoortut 14-it
Kommuneqarfik Sermersooq namminersortunut inissianik attartortitseriarluni innuttaasunut attartortitseqqiisarnera pillugu nakkutilliisoqarfik immikkoortunik 14-inik isornartorsiuteqarpoq maluginiagaqarlunilu.
Inuussutissarsiornerup iluani inissianik attartoriarluni, inissianik taakkunannga attartortitseqqiisarneq nakkutilliisoqarfiup isornartorsiorpaa.
Kommunip inissianut aningaasartuutai annertunerugaluartut, taamaattoq inissiat akikinnerusunngorlugit attartortinneqartarneri aamma paasineqarpoq.
Aalajangiinermi immikkoortut tamaasa kommunalbestyrelsemut ullumi saqqummiunneqassapput oqaluuserineqarlutillu.
Suliamut tunngatillugu saqqummiussami ilanngullugu aaqqiissutissatut siunnersuutigineqarpoq innuttaasut inissianik pisariaqartitsinerat naammassiniarlugu Namminersorlutik Oqartussat Inatsisartunilu ilaasortat oqaloqatigineqassasut.
Kina akisussaasuua
Nakkutilliisoqarfiup aalajangiineranut tunngavilersuutit misissorneqarnerata saniatigut inissianik attartortitsineq pillugu suliami kina akisussaasuunersoq aamma inissinniarneqarpoq.
Inga Dora Markussen, S, siunnersuuteqarpoq inissianik attartortitsisarnermut suliamut tunngatillugu kina akisussaasuunersoq ersarissumik aalajangiiffigineqartariaqartoq. Kommunimi nakkutilliisoqarfimmit saaffigineqareernermi kingorna inatsisilerituunut kukkunersiuisunullu katillugit 2 milliuunit koruuninik aamma aningaasartuuteqarsimavoq.
- Inissianut tunngasunik Kommuneqarfik Sermersuup suleriaaseqarnera pillugu akisussaaffimmik inissiisoqassaaq, kommunalbestyrelsillu akisussaaffiup inissinneqarnissaanut ulluinnarni aqutsinermik isumaginnittoq kisiat akisussaatissinnaavaa, taannaavorlu Borgmesteri, Inga-Dora Markussen tunngavilersuivoq.