Ineqarneq pillugu suliaq: Kommuni "isumaqatigiissutit atorunnaarsinneqarnissaannut pilersaarutinik" suliaqartoq

Kommuneqarfik Sermersuup kommunalbestyrelsiani Siumukkormiut ernummatigalugu oqaatigisimavaat, kommunip namminersortutut aningaasaliissuteqartartunit attartorsimasaanni 400-t missaanniittuni, piffissami aalajangersimasumi taamaatinneqarsinnaanngitsuni attartornerit atorunnaarpata, attartortut suneqassanersut.

Attartukkat arlallit ukiuni arlaqartuni atorneqartussaapput, tamatuma kingornatigut komunip ingerlatseqatigiiffiulluunniit ininik piginnittup attartornerit atorunnaarsissinnaavaat.

Borgmesterip Charlotte Ludvigsenip allakkatigut akissuteqarluni ilisimatitsissutigaa, attartukkat ataasiakkaat qanoq pineqarnissaannut pilersaarusiortoqassasoq:

- Namminersortunit attartukkat ataasiakkaat atorunnaarsinneqarnissaannut pilersaarusiortoqassaaq, matumanilu arlalinnik periarfissaqarpoq. Periarfissallu taakku kommunalbestyrelsimut saqqummiunneqartinnagit tamanut ammasumik oqaluuserinianngilakka, borgmesteri Sermitsiaq.AG-mut allappoq.

Pisiarineqarsinnaanerat eqqarsaatigineqartoq

Apeqqut: Isumaqatigiissutit atorunnaarpata attartukkat ilaannik kommuni pisiaqarnissamik eqqarsaateqarpa? Taamaattoqassappat - pisiaqarnissamut ileqqaarisoqarniarpa?

- Eqqarsaatersuutitsinni periarfissat takku ilagaat, taamatulli aaqqiissuteqarnissaq toqqassagutsigu, tamanna kommunalbestyrelsimi isummerfigineqassaaq, borgmesteri oqarpoq.

Kommunip inissaqartitsiniarnermut periusia Kommunit Nakkutilliisoqarfianit siorna akuersaarneqanngilaq, nakkutilliisoqarfimmiillu piumasarineqarluni Nuummi innuttaasut inissaannik pissarsiniarnermi periutsimik tamatumannga Kommuneqarfik Sermersooq atueqqissanngitsoq.

Namminersorlutik Oqartussanit naatsorsuisimaneq naapertorlugu, kommunip namminersortutut aningaasaliissuteqartartunut akiliutigisimasaasa pingajorarterutaasa affaasalu akornanniittunik Kommuneqarfik Sermersooq isertataqartarpoq.

- Ernumassutissaqanngitsut

Apeqqut: Borgmesteri attartortunut qanoq oqaasissaqarpa - attartukkat atorunnaarpata attartortut nuunnissartik naatsoruutigissavaat, imaluunniit kommuni tapiissuteqartarnerminik ingerlatsiinnarniarpa?

- Attartortut ataasiakkaat ernumassutissaqanngillat. Attartortup Iserit aqqutigalugu inigisani annaanavianngilaa. Oqaatigineqareersutut atorunnaarsitsinissamut pilersaarusiortoqassaaq, pilersaarutit kommunalbestyrelsimut qanittukkut saqqummiunneqassapput, borgmesteri oqarpoq, itisiliillunilu:

- Namminersortunit attartukkat piffissami aalajangersimasuni atorunnaarsinneqarsinnaanngillat. Tamatuma kingornatigut namminersortunit attartukkat isumaqatigiissutit malillugit nalunaaruteqarnikkut kommunip atorunnaarsissinnaavai. Namminersortunummi isumaqatigiissutit imminerminni imaaliinnarlutik atorunnaarsinneqarsinnaanngillat.

Sermitsiaq.AG-mit kommunimut apeqqutigineqarsimavoq, attartortitsisup isumaqatigiissummik atorunnaarsitsinissaq toqqassappagu kommuni qanoq iliuuseqarniarnersoq, kommunimiilli tamanna eqqarsaasersuutitigut periarfissatut isigineqarpoq, kommunimi naapertorlugu attartortut inissanik taamak amerlatigisunik ataatsikkut attartorsinnaanerat ajornakusuussaaq.

Tamakkiisumik takuneqarsinnaanngitsoq

Siumumeersup Inga Dora G. Markussenip isorisimasaa alla tassaavoq, inissaqartitsiniarnermi periuserineqartup piffissaq ungasinnerusoq eqqarsaatigalugu kommunimut qanoq akeqarsinnaaerata tamakkiisumik takuneqarsinnaannginnera. Kommunimit ilisimatitsissutigineqarpoq, piffissaq attartorfiusoq pillugu takussutissat maannakkorpiaq pissarsiarineqarsinnaanngitsut.

Tamatuma saniatigut Siumumeersoq Inga Dora G. Markussen isumaqarpoq, namminersortunut attartornissamik isumaqatigiissutit aqqutigalugit, inuussutissarsiutinik ingerlataqartut ataasiakkaat arlallit piffissap ingerlanerani aningaaasarpassuanik tunineqarsimasut, tassa kommuni karsia malunnaatilimmik amigartooruteqartillugu.

Isornartorsiulli tamanna borgmesterip isumaqatiginngilaa:

- Isumaqarpunga tunniussaqarsimanata. Namminersortut niuerfiaanni akigititat malillugit attartorsimavutut, namminersortutullu attartortitsisut iluanaaruteqarsimapput. Tamanna tunniussinertut oqaatigineqarsinnaanngilaq. Kommuni 2015-imi ilaatigut sulisut inissaannik pissarsiniarnermi annertuumik ajornartorsiuteqarsimavoq. Tamanna eqqarsaatigalugu nalilerneqarsimavoq, namminersortut inaataannik attartornissaq akilersinnaanerussasoq, tassami nammineq sanaartonermi aamma annertuunik aningaasartuuteqartoqartarmat, Charlotte Ludvigsen oqarpoq.