Ineqarneq pillugu suliaq: Ineqarnermut akiliutit taamaammat appasitsinneqarput

Pisortat inissiaataanni ineqarnermut akiliutissat aalajangersarneqarnissaannut malittarisassat malitsigisaannik, pisortat inissiaataat nutaat kommuninut amigartoorutaasarput, pisortammi inissiaataannut amerlanerusunut tapiissuteqartoqartarmat .

Kommuneqarfik Sermersuup inissiaatileqatigiiffiutaani Iserimmi pisortat taamatut nassuiaavoq.

Kommuneqarfik Sermersuup inissianik namminersortunit attartoriarluni innuttaasunut amigartooruteqartumik attartortitseqqiisarnera unitsinneqassasoq Kommuninut Nakkutilliisoqarfimmit peqqussutigineqarnerata malitsigisaanik pisortaq taamatut oqaaseqarpoq.

Taamatummi ingerlatseriaaseqarneq innuttaasunik assigiinngissitsineruvoq, kommunilu taamaalioqqusaanani. Kommunimit tunngavilersuutigineqarsimavoq, nunami maani pisortat inissiaataannut allanut aamma tapiissuteqartoqartartoq.

Sanaartornermi akigititat qaffasinnerujussuusut

Iserimmi pisortaq naapertorlugu, annertuumik takuneqarsinnaanngitsumik tapiissuteqartoqartarneranut nassuiaataasoq, ineqarnermut akiliutigineqartartut ilaannit piginnittut aningaasaliissutinit iluanaarutigisartagaat pillugit malittarisassaniittoq:

- Piginnittut aningaasaliissutinit iluanaarutigisartagaat ineqarnermut akiliutissatut naatsorsuinermi 15.000 koruuninut killilerneqarsimanerat (tassa akiliutigineqartartut 1,5%-iinik iluanaaruteqartarnissap naatsorsorneqarnerani) aamma sanaartornermi akitiginneqartartut kvadratmeterimut annerusumuluunniit 25.000 koruuniusarneranni pisortat inissialialerititaannut tamanut tapiissuteqartoqartarpoq. Tamanna allatut tapiissuteqarnerinnaavoq, tapiissutaavorli, Iserimmi pisortaq Torben Kortegaard Sermitsiaq.AG-mut oqarpoq.

Iserit ineqarnermut suliamut attuumassuteqarpoq, inissiammi kommunip innuttaasunut attartortittagai Isertit aqqutigalugu innuttaasunut inissaminnik utaqqisunut attartorteqqinneqartarmata.

Pisortap nassuiaatigaa, pisortat inissiaateqartarneranni siunertarineqartoq, inunnut ineqarnermut akiliutinik akiliinissamut ajornartorsiortartunut imaluunniit inissaminnik namminneq pisiaqarsinnaanngitsunut inissaqartitsisoqarnissaa. Malittarisassalli maanna atuuttut aaqqissugaanerisigut ineqarnermut akiliutit appasittuunerat attartortunut tamanut iluaqutaasarput, tassa aningaasaatikittuinnarnuunngitsoq:

- Atugarissaartunut iluaqutaasartoq

- Pisortat inissiaataanni attartorneqartartuni ineqarnermut akiliutit appasitsinneqarnerat atugarissaartunut aamma iluaqutaasarpoq, tassa inuiaqatigiit ikiorsiissutitut tapiissutigisartagaat atugarliornerusunuinnaq tapiissutigineqarneq ajorput, piitsuunerusunullu aamma pisuujunerusunut agguaanneqartaramik, Torben Kortegaard oqarpoq.

Politikkerit tapiissutaasartut pisariaqartitsisunuinnaq tunniunneqartarnissaa qulakkeerusuppassuk ineqarnermut inatsit allanngortinneqartariaqarpoq:

- Ineqarnermut qaffasinnerusumik akiliuteqartitsisartuuppat – pitsaanerusumik ineqarnermut tapiissuteqarnermik ilallugu – ikiorsiissutitut tapiissutigineqartartut atugarliornerpaanut atorneqartassagaluarput, atugarissaarnerusullu ineqarnerminnut akiliuteqartinneqarnerusarlutik, immaqalu atugarissaarnerusut namminneq inissaminnik pisiaqarnissamut kajumissuseqarnerulissallutik, taamaalillunilu pisortat inissiaataat innuttaasunut isertitakinnerusartunut attartortinneqartalissallutik, Torben Kortegaard Aningaasaqarnermut Siunnersuisoqatigiit inassuteqaataannut tamanna naapertuunnerussasoq innersuussisoq oqarpoq.

Nakkutilliisut Kommuneqarfik Sermersuup periuserisaminik akerlerineqaqisumik unitsitseqqusinermi saniatigut, kommunimi ingerlatsivik borgmesterillu politikkikkut akuersititseqqaaratik namminersortunit attartortarsimanerat isornartorsiorpaat.