Ineqarneq pillugu suliaq: Attartortut eqqissiallassinnaanngorput

Nuummi innuttaasut hunnorujulikkaat maannakkorpiaq namminersortut inaataanni, kommunip inissiaatileqatigiiffiutaa Iserit aqqutigalugu kommunimit attartoqqisimasaminni najugaqarput.

Attartorsimasut Nakkutilliisoqarfiup Kommuneqarfik Sermersuup suliamut atatillugu periuserisimasaanik suliaqarnera pissangallutik malinnaaffigisimassavaat. Nakkutilliisut marlunngornermi Kommuneqarfik Sermersuumut peqqussutigaat, periuseq atorneqartoq unitseqqullugu aamma ilisimatitsissutigaat, periuserineqarsimasoq inatsisit avaqqullugit ingerlanneqarsimasoq.

Attartortulli maannamut eqqissiallassinnaanngorput, Nakkutilliisummik aalajangiinerat taakkununnga kinguneqartinniarneqarpasinngilaq.

Taamatut oqaluttuarpoq Nakkutilliisoqarfiup Allattoqarfiani pisortaq Klaus Georg Hansen.

Borgmesteri: Kinguneqartitsisoqassanngilaq

- Nakkutilliisut aalajangiinerat isumaqatigiissutaareersimasunut arlaatigut kinguneqartinneqassanngilaq, Nakkutilliisoqarfimmi pisortaq oqarpoq.

Borgmesteri Charlotte Ludvigsen (IA) Sermitsiaq.AG-p apeqqutaanut allakkatigut akissuteqarluni qisuariarsimavoq:

Nakkutilliisut aalajangiinerat innuttaasunut inissiani najugaqartunut qanoq kinguneqassava?

- Maanna attartortunut tamanna kinguneqassanngilaq. Atuarsinnaasakka naapertorlugit, nakkutilliisut nutaanik attartortitsinissamut isumaqatigiissusiortarnerup unitsinneqarnissaa taamaallaat peqqussutigaat, Charlotte Ludvigsen akissuteqarpoq.

Nakkutilliisulli suliaqarsimanerisa malitsigisaannik, namminersortut inissiaataannik attartortarnermi ajornartorsiutaasartut arlallit eqqumaffigineqarnerulerput.

Nakkutilliisut aalajangiinerminni inassutigaat, 'allanut attartortitsinermut isumaqatigiissutit
innuttaasunut isumaqatigiissutigineqartut inatsisinut naapertuunnersut pillugu Ineqarneq
pillugu Naammagittaalliuuteqartarfik nammineq aallartitaminik isummersinnaanersoq,
Ineqarnermut, Attaveqaasersuutinut, Naligiissitaanermullu Naalakkersuisoqarfik
Naliliissasoq'.

- Inatsimmik unioqqutitsinerunngitsoq

Kommunip attartornermi isumaqatigiissutigineqarsimasut inatsimmik unioqqutitsinerusut paasinarsissappat, innuttaasut tapersersorniarpai? Taamaassappallu qanoq tapersersorniarpai?

- Attartornermik isumaqatigiissutit inatsisinik unioqqutitsinerunngillat. Paasisimavarput, Iserit inissiaataanni attartortut Ineqarnermut Naammagittaalliuuteqartarfimmi suliassaatiminnik maannakkorpiaq suliaqartitsisinnaanngitsut. Attartortut tamarmik Ineqarnermut Naammagittaalliuuteqartarfimmut naammagittaalliuuteqarsinnaanerat uagutsinnut pingaaruteqarpoq. Taamaammat Namminersorlutik Oqartussat attartortutta naammagittaalliorfissaqaqqilersinnaanerat pillugu suliaqarnissaat sulissutigaarput.

- Tamanna pisinnaanngippat, ineqarnermut nammineq naammagittaalliorfissatsinnik pilersitsiniarpugut, attartortut naammagittaalliortarfittut atuutereersutulli pisinnaatitaaffeqarnissaat anguniarlugu, Charlotte Ludvigsen oqarpoq.

Kommuni naapertorlugu suliami attartortut 416-it pineqarput.

Inissiat kommunip inaatiginngilai, kommunili namminersortut inissiaataannik attartornermut ukiut tamaasa akiliuteqartarpoq. Kommuninut Nakkutilliisoqarfik naapertorlugu, aaqqissuussami ajornartorsiutaasoq tassavoq, taamatut aaqqissuussisoqarsimanerani kommunip amigartooruteqarluni ingerlanera.

Kommunip taamaalilluni innuttaasut assigiinngitsumik sullippai, innuttaasummi ilaat ineqarnerminnut appasissumik akiliuteqartarlutik inissiani nutaajusuni najugaqarput. Nakkutilliisullu naapertorlugit kommuni taamaalioqqusaanngilaq.

Sermitsiaq.AG-p suliaq pillugu borgmesteri oqaaseqartinniarlugu sulissutigaa.