Ineqarneq pillugu suliaq: Attartornissamik isumaqatigiissutit ataatsimiititamit akuerineqarsimanngillat
Kommuneqarfik Sermersuumi inissaqartitsiniarluni periuserineqarsimasoq tunngavissaqarluartumik politikkikkut akuerineqartarsimanngilaq. Isumaqatigiissutit marluk aningaasaqarnermut ataatsimiititaq peqataatinnagu allaffissornikkut isumaqatigiissutigineqarsimapput.
Kommuninut Nakkutilliisoqarfiup aalajangiussani Kommuneqarfik Sermersuumut sakkortuumik isornartorsiutitalik marlunngornermi ualikkut saqqummiuppaa.
Nakkutilliisoqarfiup oqaatigaa, kommunip innuttani inissaqartinniarlugit periuserisimasaa inatsisinik unioqqutitsinerusoq unitsinneqartariaqartorlu. Aalajangiussaq atuaqqissaaraanni takuneqarsinnaavoq, kommunip aqutsisimanera isornartoqartinneqaangaatsiartoq, Nakkutilliisoqarfiullu tassunga atatillugu inassutigaa, kommunimi ineqarnermut tunngatillugu sakkortusisamik nakkutigineqassasoq.
Nakkutilliisoqarfimmit ilaatigut isornartorsiorneqarpoq, Aningaasaqarnermut Ataatsimiititaq akuersiteqqaarnagu allaffissornikkut marlunnik isumaqatigiissuteqartoqarsimanera. Suliffeqarfinnik isumaqatigiissuteqarsimanerni inissiat arlallit kommunimit attartorneqariarlutik innuttaasunut attartorteqqinneqarsimapput.
Borgemsterip Charlotte Ludvigsenip (IA) oqaatigaa, suliaq sulisunut kinguneqarsimasoq:
Atuarneqarsinnaavoq, Aningaasaqarnermut Ataatsimiitaq tunngavissaqarpallaarani aalajangiisimasoq - tamanna sulisunut kinguneqartinneqassava?
- Aap. Tamanna kinguneqartinneqareerpoq, borgmesteri oqarpoq. Oqaatigerusunngilaali qanoq kikkunnullu tamanna kinguneqartinneqarsimanersoq. Sulisunut tunngassuteqarpoq, taanna nassuiaavoq.
Namminersorlutik Oqartussat kommuninik nakkutilliisimanerisa kingorna ukiut marluk qaammatillu arfinillit ingerlareersut Nakkutilliisut aalajangiipput. Piffissami pineqartumi nakkutilliisut suliami ilungersunartumi susoqarsimanersoq paasiniarlugu pappialarpassuit kommunip tunniussimasai misissoqqissaarsimavaat.
Nakkutilliisut tamanna tunngavigalugu isumaqarput, kommunip sanasunut namminersortunut attartornissamik arlalitsigut isumaqatigiissuteqartarsimanera politikkikkut akuersissutigineqartarsimanngitsoq. Nakkutilliisunillu tamanna isornartoqartinneqarluinnarpoq:
- Ilaannakortumik tunngaveqarluni aalajangiisimaneq
- Nakkutilliisoqarfiup sakkortuumik isornartorsiorpaa Aningaasaqarnermut
Ataatsimiititaliap paasissutissanik naammattunik tunngavilimmik
inuussutissarsiornermi attartornermut isumaqatigiissuteqarnermut
akuersissuteqarsinnaanissaata qulakkeernissaanut, Kommuneqarfik Sermersuumi
Aningaasaqarnermut Ataatsimiititaliamut suliassami paasissutissiineq
naammassimanngitsoq.
Nakkutilliisut Allattoqarfianni pisortap Klaus Georg Hnasenip tamanna itisilerlugu oqaatigaa, atortut politikkerinut saqqummiunneqarsimasut amigaateqartut:
- Periuserineqarsimasoq tamatumalu kinguneqaatissai tamarmiusut aningaasaqarnermut ataatsimiititamut takutinneqaratillu saqqummiunneqarsimanngillat. Tassa ataatsimiititami politikkerit suliffeqarfinnut isumaqatigiissutit ataasiakkaat ilaannakortumik tunngaveqarluni aalajangiisimanerit akuersissutigisimavaat, Klaus Georg Hansen oqarpoq.
Nakkutilliisut borgmesterip Aningaasaqarnermut Ataatsimiititaq aalajangiiseqqaarnagut attartornissamik isumaqatigiissutinut pingasunut atsiorsimanera aamma isornartorsiorpaat.
Nakkutilliisut naapertorlugit, kommunip periuseq atorneqarsimasoq 2015-imiit 2020-p tungaanut ingerlassimavaa. Piffissami pineqartumi Asii Chemnitz Narup aamma Charlotte Ludvigsen borgmesteritut atuuffeqarsimapput.
Klaus Georg Hansenip nassuiaatigaa, borgmesteri tassunga atatillugu isornartorsiorneqartoq, borgmesteri kommunip aqunneqarneranut siuttuullunilu akisussaasuummat.