Ineqarfinni oquttarnera akiorniarneqalerpoq
Ilaqutariit 64-it INI A/S-imi najugaqartut inaat oqoqarpoq. Oquttarnera anigorniarlugu iliuuseqartoqalerpoq
2018-ip naanerani Nuummi, Sisimiuni, lIulissani Qaqortumilu oqummik suliat ilisimaneqartut katillugit 171-iupput, INI A/S ilisimatitsivoq.
- Taakkunannga 64-it najorneqarput aammalu 107-it qimanneqarsimallutik. Tassalu inissianit attartortittakkanit 5% -it oqummik nassaarfigineqarsimapput, ineqarnermut naalakkersuisoq Karl Frederik Danielsen Sofia Geislerip paragraf 37 naapertorlugu apeqqutaanut akissuteqarpoq.
Najugaqartut peqqissusaat
Ilaqutariit inissiani oqummik ajornartorsiuteqarfiusuni najugaqartut peqqissusaat pingaaruteqartoq Naalakkersuisut ilisimatitsisipput.
- 2018-imi decembarimi maskiinat nutaat pisiarineqartut marluk atorlugit misileraalluni suliamik aallartitsisoqarpoq, taakkulu inissiat oquup naaneqaataanik piiaavigineqarnerinut misilerarneqarput. Suliaq misiligutaasoq oquiaanerup naammassinissaata tungaanut illup iluata ilaqutariinnut isumannaatsuunissaa siunertaralugu suliarineqarpoq, Karl Frederik Danielsen oqarpoq.
Akissutigineqartut ernumagineqarput
Karl Frederik Danielsenip akissutai tunngavigalugit Sofia Geisler apeqquteqaqqippoq. Tusagassiutinut nalunaarummi ima allappoq:
- Ernumanartippara attartortut taama amerlatigisut suli najugaqarmata inissiani oqummik ajornartorsiuteqarfiusutut ilisimaneqalereersuni. Apeqqutit arlallit uanni pinngorpoq. Inuit pineqartut peqqissusaat maannakkut ungasinnerusorlu eqqarsaatigalugu qanoq sunnerneqarpat? Inoqarpa inissiani oqummik ajornartorsiuteqarfiusuni najugaqartunik tamannalu napparsimasalissutigereersimagaat, immaqalu sulinerannut sunniutereerluni? Inissiani oqummik eqqorneqartuni najugaqartariaqarnerminni qaammammut akiliutaat appartinneqarpa?, IA-mi politikeri aperaaq.