India Issittumi sunniuteqarnerorusuttoq
Indiami ministeriunerup, Narendra Modip suleqatigiinnerunissaq pillugu Ruslandip præsidentia, Vladimir Putin oqaloqatigisimavaa
Nunarsuarmi nunat sunniuteqarnerpaat ilaat Issittumut tunngatillugu soqutiginninneruleriartorpoq. India 1,3 milliardit sinnerlugit innuttalik issittumi maanna suliaqarnerulerusuppoq, Barents Observer allappoq.
Indiap ministeriunerata, Narendra Modip Ruslandimi præsidenti, Vladimir Putin septembarip sisamaani tallimaanilu Vladivostokkimi ataatsimeeqatiginiarpaa.
Ataatsimoorluni allakkiami takuneqarsinnaavoq ataatsimeeqatigiinnermi ilaatigut Issittoq oqaluuserineqarniartoq.
- Indiap soqutiginnillu Issittumi ineriartorneq malinnaaffigaa, Issittumilu Siunnersuisoqatigiinni sunniuteqarnerunissamut piareersimalluni, naalagaaffiit taakku marluusut siuttuisa nalunaarutaanni taamak allassimasoqarpoq.
India 2013-imili Issittumi Siunnersuisoqatigiinni aalajangeeqataasinnaanani ataatsimeeqataasarpoq.
- India Issittumut tunngassuteqartunik Ruslandimik suleqateqarnerminik siuarsaaqataarusuppoq.
Gassi uulialu
Indiap Issittumut tunngatillugu soqutisaasa ilaatigut ilagaat russit naturgassiutaat, nunami aningaasatigut siuariartussaguni nukissiuutitigut isumalluutissanik pisariaqartitsivoq.
Nunat taakku marluk nukissiuuteqarnermut tunngassutilinnik suleqatigiilluareerput, pilersaarutaavorlu russit-indiamiut ruujoriutaannik talliliinissaq, Issittoq angullugu ruujoreqalernissaq anguniarlugu.
Ilaatigullu Ruslandip Issittortaani gassisiornermut uuliasiornermullu
tunngatillugit nunat taakku marluk siuttuisa suleqatigiittarnertik pitsanngorsaaffiginiarpaat.
- Siuttut aalajangiussimavaat, Ruslandimi Indiamilu nunat sananeqaataat pillugit misissuisarnermut aamma uuliaqarfinnik gasseqarfinnillu ataatsimoorluni inerisaasarnermut tunngatillugit suleqatigiittarnermik siuarsaasoqarnissaa. Ruslandimiit Indiamut nukissiuutinik pilersuineq inerisaaffiginiarlugu suliniuteqarnertik ingerlateqqinniarpaat, tassunga ilanngullugit russit uuliaataannik akuiarneqanngitsumik pilersuineq pillugu piffissamut sivisuumut isumaqatigiissuteqarnissaq, Avannaarsuani Imaatigut angallaffimmik atuisinnaaneq kiisalu ruujoreqarnermut tunngasoq, allakkiami ilanngullugit allassimapput.