Inatsit ukiut 22-t qaangiuttut nutarterneqarpoq: Unioqqutitsilluni nunasinermik pinngitsoortissaaq
Nunani allamiut pillugit inatsisip nutarterneqarnissaa tusarniaassutigineqarpoq. Inatsit Kalaallit Nunaanni pisoqalisimasoq ukiuni arlalinni isornartorsiorneqareersorlu tamanna pivoq. Politikerip pitsaasuunerarpaa.
Kalaallit Nunaanni Nunani allamiut pillugit inatsit 2001-mili nutarterneqarsimanngilaq. Inatsit danskit akisussaaffeqarfianniippoq, Danmarkimilu inatsit piffissap ingerlanerani arlaleriarluni sukateriffigineqarlunilu naleqqussarneqartarsimavoq, allannguutilli Kalaallit Nunaanni atuutilersinneqarsimanngillat.
Inatsimmi immikkoortut sorliit Kalaallit Nunaanni Savalimmiunillu atuutilersinneqassanersut suleqatigiissitap suliarisimavai, tamatumalu inernera danskit naalakkersuisui sinnerlugit Naalakkersuisunit tusarniaassutigineqarpoq. Allannguutit EU-mi peqqussutinik arlalinnik, Shenghen pillugu suleqatigiinnermut tunngassuteqarput.
Tusarniaassutigineqartut naapertorlugit nunami allamiut unioqqutitsillutik nunamut isinnginnissaannik kiisalu peqqarniisaarniarneq pillugu akuiunermut malittarisassanik sukaterinissamut ataatsimut isigalugu siunertaqarput.
Chemnitz: Pitsaasuuvoq
savalimmiut kalaallillu killeqarfiini ungalliunerusuni, nakkutiginninnerup aammalu nakkutilliinerup sunniuteqarluartup ingerlaannarnissaanik isumannaarinissaq allannguutit qulakkiissavaat, tamanna allaqqavoq.
Folketingimut ilaasortaq Aaja Chemnitz (IA) Nunani allamiut pillugit inatsisip nutarterneqarnissaanik isornartorsiuilluni piumasaqartut ilagaat.
Maanna allannguisoqalernera nuannaarutigaa:
- Nunani allamiut pillugit inatsisip ukiut 22-t atuussimasup nutarterneqalernera pitsaasuuvoq. Danmarkip inatsisini arlaleriarluni sukateriffiginikuuaa, kalaallillu inatsisaat naleqquttumik nutarterneqarsimanani.
Akulerutsitsinermut apeqqummut eqqaanartoq
Suliassaqarfimmi inatsimmik Kalaallit Nunaata aaqqittariaqagaanik aamma eqqaasitsivoq:
- Nunatsinni nunasisunut inuiaqatigiinnut akulerutsitsinermut inatsit suliffeqarnermut, ineqarnermut aamma oqaatsinik kulturimillu ilinniartitsinermut tunngasoq akisussaaffigalugu eqqaamasariaqarparput. Ullumikkut qimaasunik innuttaasoqanngilagut, kisianni inatsisip aamma akulerutsitsinerup inissinneqarnissaa pingaaruteqarpoq, Aaja Chemnitz oqarpoq.
Kalaallit Nunaat 2019-imi qimaasumik ataatsimik nunasititsivoq. Angut Ukrainemeersoq ukiuni kingullerni Nuummi najugaqarlunilu sulisuuvoq. Ruslandip Ukrainemut saassussineranut atatillugu angerlarluni sorsunnermut peqataajartorpoq, tassanilu toqutaavoq.