Inatsit tunngaviusussaq pillugu isumalioqatigiissitap inernera: Oqallitsitsinissaq siunertaavoq

Kalaallit Nunaat namminiilivippat inatsit tunngaviusoq qanoq isikkoqassava? Danskit inatsisaannut tunngaviusumut assingussava, imaluunniit kunngeqarfiussaagut præsidenteqarlutaluunniit? Apeqqutit taama ittut inatsit tunngaviusoq pillugu isumalioqatigiissitap 2019-imili aallartinneqarami sammisimavai.

- Nunarput namminiilivippat qanoq kissaateqarnerput aammalu aalajangersaanerit qanoq ittut atorneqarnissaat pillugit oqallinnermut suliagut tapiliutaasinnaasut neriuutigaara, siulittaasunngoqqammersoq Ineqi Kielsen (S) oqarpoq. Taanna siulittaasunngorpoq Kuupik Kleist qaammatini pingasuni siulittaasooreerluni isumalioqatigiissitamit siorna tunuarmat.

Inatsit tunngaviusumik isumaliutigisamillu 2021-mi saqqummiisoqarnissaa pilersaarutaasimagaluarpoq. Coronali, ilaasortat, siulittaasoq allattoqarfimmilu sulisut taarseraannerat pissutigalugu suliap naammassinissaa kinguartinneqartarsimavoq.

Siusinnerusukkut naammassisimasinnaagaluarpoq

Sulialli saqqummiunneqarnissaat aprilimi pisussanngorpoq. Isumalioqatigiissitami sulitinneqartut partiini pingasuneersut, tassa Naleraq, Demokraatit aamma Siumut, tuaviortumik sulisariaqalerput naammassisassat kingulliit piareerniarlugit.

- Inatsit tunngaviusussaq pillugu ukiuni kingullerni annertuumik suliaqarpugut, isumaqarpungalu 1. april saqqummiussinissamut naammassereersinnaasugut, Ineqi Kielsen Sermitsiaq.AG-mut oqarpoq.

Siulittaasoq isumaqarpoq siusinnerusukkut saqqummiussisoqarsinnaagaluartoq.

- Nammineerlunga isumaqarpunga siusinnerusukkut tunniussisinnaagaluartugut. Isumaqartoqarpat suliap pitsaassusaa tamassuminnga eqquissasoq, taava innuttaasut, Inatsisartut, Naalakkersuisullu namminneerlutik suliamik nalilersuissapput.

Aningaasaliissutit siorna pisat atorlugit ingerlasut

Taassumalli uggoraa isumalioqatigiissitami aalajangeeqataasinnaanatik peqataatinneqartut arfinillit maanna suleqataajunnartinneqarmata.

- Uggornarpoq suliap inaarsarnerani peqataasinnaanngimmata, suliamummi tunngatillugu eqqaamasaqarluinnarput. Taakku amerlanersaat allattoqarfinni sulisuniit ilaasortallu ilaanniit sivisunerusumik issiaqataasimapput. Nunatta aqunneqarneranut inatsisiliornermullu aamma misilittagaqarluarput ilisimasanillu ulikkaarlutik.

Suliap inaarsarnissaanut isumalioqatigiissitamut allattoqarfimmut 5,7 milliuunit koruunit siorna aningaasaliissutigineqarput. Aningaasanut inatsimmut ukioq mannamoortumut immikkut aningaasaliisoqarsimanngilaq isumalioqatigiissitap naammassiniaaneranut iluaqutaasussamik.

Inatsit tunngaviusoq pillugu isumalioqatigiissitap siulittaasuata aningaasat sinneruttut nammineq qanoq atussanerlugit aalajangissagaa,Naalakkersuisut ilisimatitsipput.

Inatsit tunngaviusoq pillugu oqallinnissaq neriuutigigaa

Isumlioqatigiissitap suliassaa 2021-mi allanngortinneqarmat innuttaasut peqataatinneqarnissaanut tunngasoq peerneqarsimavoq. Sulinermilu ukiuni kingullerni innuttaasut peqataatinneqarsimanngillat. Inatsit tunngaviusussamulli siunnersuut innuttaasunik oqallitsitsissasoq, siulittaasoq neriuuteqarpoq.

- Neriuppunga oqallitsitsisinnaassasoq. Ernummatigisinnaasatuara tassaavoq innuttaasut oqallisigissanngikkaat. Aamma neriuutigaara innuttaasut oqallinneranni ersarissiumaartoq inuiaqatigiinni innuttaasut piginnaatitaaffii pisussaaffiilu ersarinnerulerumaartut.

Inatsisartut suleriaqqinnissaannut innersuussutinik aamma peqarumaartoq, Ineqi Kielsen ilisimatitsivoq.