Inatsit tunngaviusoq aallaavigalugu kalaallit inuusuttaat 900-t allagarsitinneqartut
Allakkat titartakkanik kiisalu tunngaviusumik inatsimmut tunngasunik imallit kalaallinut kukkusumik nassiussisoqarsimanera Folketingimi siulittaasumit utoqqatsertoqassaaq.
Folketingip siulittaasuanit kalaallit 900-t missaanniittut tunngaviusumik inatsimmik imalimmik allagarsipput. Allakkap qulequtaraa 'Min grundlov', tassa 'Tunngaviusumik Inatsisera'.
Allakkat 2019-mi juni nallertinnagu 18-liisimasunut nassiunneqarput. Allakkani aamma titartakkat kiisalu tunngaviusumik inatsit aamma kikkut tamat oqartussaaqataanerannik tunngasunik imaqarpoq.
Inatsit atorneqarli!
Inuusuttut qinerseqataasarnissaat anguniarlugu taamatut nassiussisoqarpoq. Danmarkimi marlunngorpat kommunimut qinersisoqassaaq. Nassiunneqartulli kukkusumik nassiunneqarsimapput.
- Kukkusoqarsimanera ajuusaarutigaarput. Qinerserngaartussanut taamaallaat nassiunneqarsimasussaagaluarpoq, Folketingimi attaveqaqatigiinnermut pisortaq Søren Væver allappoq.
- Tunngaviusumik inatsit pillugu atuarneqarsinnaasut neriuppugut atorluarneqassasut. Kukkussutigineqarsimasut qaangiinnarneqarnissaat neriuutigaarput.
Kukkuneq
Kingillermik qinersisoqarmat, tassa Folketingimut 2019-mi qinersinermi, kalaallit 1.800 -t missaanniittut 18-liisimapput, taamaasillutik qinersisinnaalerlutik. Taakku affaat allagarsipput, utoqqatsissummillu nassinneqartussanngorlutik. Kukkuneq folketingimi ilaasortamit Aki-Matilda Høegh-Damimit paasineqarpoq.
- Kalaallit Nunaannut nassiunneqartut kukkuneq paasineqarmat unitsinneqarput, ilisimatitsissutigineqarpoq.
Savalimmiuni assingusunik nassiussisoqanngilaq.