Inatsit nutaaq: Meeqqanut 12-t ataallugit ukiulinnut kanngutsaatsuliorneq pinngitsaaliinerujuaannassaaq
Pinerluttulerinermi inatsisip allanngortinneqarnissaanut siammasissumik politikkikkut tapersersuisoqartoq
Meeqqamik 12-t ataallugit ukiulimmik kinguaassiutitigut atornerluineq pinngitsaaliinertut maannamit pineqaatissiissutaajuaannalissaaq, tamatuma qanoq pisimanera apeqqutaatinnagu.
Tassami siullermeerinninnermi Kalaallit Nunaanni pinerluttulerinermi inatsisip allanngortinneqarnissaanut siunnersuummut politikkikkut tapersersuineq annertuvoq.
Ullumikkut meeqqanik 12-t inorlugit ukiulinnik kinguaassiutitigut kanngutsaatsuliorneq sakkortuumik pineqaatississutaasareerpoq. Kisianni kanngutsaatsuliornerni taamaattuni tamani pinngitsaaliilluni atornerluisoqarneranik pineqaatissiisoqarneq ajorpoq, kisianni paragraffit allat atorneqartarlutik. Maannamit pinngitsaaliilluni atornerluinertut pineqaatissiissutigineqartalissapput, aamma nakuusernertaqaranilu sioorasaarinertaqanngikkarluarpalluunniit.
Inatsisartut tamakkerlutik allannguummut akuersipput. Inuit Ataqatigiit suli sukatereqqinnissamik aamma kissaateqaraluarpulluunniit. Killigitinneqartup 15-nik ukiulinnut qaffanneqarnissaanik taakku isumaqarput. Tamanna oqaaseqartartup Stine Egedep ilanngussaanik atuarneqarsinnaavoq.
Inatsisip allanngortinneqarneratigut imaanngilaq sakkortunerusumik pineqaatissiisoqartalissasoq, meeqqanik 12-t ataallugit ukiulinnut kanngutsaatsuliorneq sakkortuumik pineqaatissiissutaasareermat. Danmarkimi assingusumik allannguisoqarmat, sakkortunerusumik pillaasoqartarneranik kinguneqarnikuunngilaq.
Siunnersuut siorna ukiaanerani ataatsimiinnermi suliarineqareerpoq. Pilersaarut malillugu upernaakkut ataatsimiittoqarnerani akuerineqartussaanikuugaluarpoq, kisianni ilisimaneqareersutut qinersisoqarnera aporfiuvoq.