Inatsit nutaanngilisoq politimesterip isornartorsioraa: Folketingimi ilaasortaq tapersiivoq

Nunatsinni aqqusinermi angallannermut inatsit nunat allamiunullu inatsit nutaanngililluinnarput.

Folketingimi ilaasortaq Aaja Chemnitz Larsen (IA) taama isumaqarpoq. Taassuma politimester Bjørn Tegner Bay, Altinget.dk-mi apersorneqarnermini oqariartuutai isumaqatigilluinnarpai. Politimesterip oqaatigaa nunatsinni aqqusinermi angallannermut inatsit aamma nunat allamiunut inatsit kinguussaalluinnarsimasut.

Nunatsinni aqqusinermi angallannermut inatsit 2008-mi nutarterneqarpoq, nunanillu allamiunut inatsit 2001-imi nutarterneqarluni.

- Inatsisit atuuttut Christiansborgimit akisussaaffigineqartut, kinguussaaqqalluinnarput, politimester Bjørn Tegner Bay Altinget.dk-mut oqarpoq.

Naalakkersuisut ilungersortariaqarput

Aaja Chemnitz Larsen isumaqataavoq:

- Taama oqariartuuteqarnermut isumaqataalluinnarpunga. Kalaallit Nunaanni aqqusinikkut angallannermut inatsit aamma nunanit allamiunut inatsit nutaanngililluinnarput nutartertariaqavillutillu. Inatsisit Danmarkimi nutarterneqareersimatillugit nunarput inatsisinik atuutsitsilertussaatillugu Naalakkersuisut akisussaasuusarput, Aaja Chemnitz Larsen oqarpoq.

- Assersuutigalugu angallannermut tunngatillugu immikkoortut 14-it suli nutarterneqanngillat. Danskit naalakkersuisuisa inatsisiminnik nutarterigaangata, assersuutigalugu aqqusinermi angallannermut inatsimmi, Kalaallit Nunaat malinnaanngitsoortarpoq, Sermitsiaq.AG-mut oqarpoq.

Inatsisit atuutsilersinneqartut nunatsinni aamma atuuttussanngortinneqartussaagaangata Kalaallit Nunaat danskit naalakkersuisuinut atuutsitsilernissamut piumasaqartarput, akisussaaffik nunatta suli angerlaannikuunngimmagu.

Atoqatigiilernermi akuersisitseqqaartarnissamut inatsit tassani assersuutissatsialaasoq, folketingimi ilaasortap tikkuarpaa. Atoqatigiilernermi akuerseqqaartoqartarnissaanut inatsit Danmarkimi siorna atuutsilersinneqarpoq. Kalaallit Nunaanni inatsisip atuutsilernissaanut suliniut sukkalluinnartumik ingerlanneqarportaaq, Naalakkersuisullu Danmarkimut piumasaqarsimalereerput inatsimmik nunatsinni atuutsitsilernissamut.

Danskilli naalakkersuisuisa inatsisinik atuutsitsilernerminni nunarput peqataarusunnersoq aamma aperisarsinnaanerat, folketingimi ilaasortap oqaatigaa. Amerlasuutigummi inatsisit atuutsinneqalersut nunatsinnut aamma soqutiginaateqartarput.

Imminnut utaqqiinnarput

Nunatsinni aqqusinikkut angallannermut inatsimmi, nunatsinni atuutinngitsoq tassaavoq piffissaq aalajangersimasoq qaangiussimatillugu biilinik nakkutilliisarneq.

Nunatsinni biilit kingullermik nakkutilliiffigineqarput 1999-imi. Biilit nakkutilliiffigineqarnerini biilit aqqusinermi angallannermut ulorianartorsiortitsinnginnersut misissorneqartarput.

- Isumaqarpunga biilit nakkutilliiffigineqartarnissaat pingaaruteqarluinnartuusoq. Kingullermik nakkutilliisoqarmalli maannamut nunatta danskillu akornanni attaveqatigiinneq unittoorluinnarsimavoq, suliamilu susoqaqqissimanani.

- Isumaqarpunga suliani assigiinngitsuni Danmarkip nunarput utaqqiinnartaraa, nunattalu Danmarki utaqqiinnartaraa. Inatsisillu nutarterneqarnissaanut tunngatillugu nunarput soqutigisaqarnerujussuuvoq, danskilli allaffissornikkut nukissaqarnerujussuullutik, Aaja Chemnitz Larsen oqarpoq.

Taassuma naalakkersuisut kaammattorpai aqqusinermi angallannermut inatsisip nutarsarneqarnissaanut danskinut qinnuteqaqqullugit:

- Uanga qanoq iliorsinnaanera killeqarpoq. Inatsisinillu nutarsaanissamut periarfissaq uagutsinni uninngaannalerpoq. Naalakkersuisut inatsisinik atuutilersunik atuutsitsiniarnissamut ilungersortariaqarput. Inatsisit atuuttussanngortikkusutat tulleriiaartussanngorlugit allattorsimasuutigineqartariaqarput, Aaja Chemnitz Larsen oqarpoq.