Kalaallit Nunaanni Naatsorsueqqissaartarfik
Inatsissasut siunnersuut: Ataasiinnaq akilerneqartussaangaluartoq – massakkut tamarmik akilerneqassapput
Naatsorsueqqissaartarfiup siulersuisuini ilaasortaq Henrik Lethip soraarsitaanera upernaarmanna sammineqangaatsiarpoq, massakkulli ilimanarsivoq siulersuisuni ilaasortat ukiumut hunnoruju-tusintit sinnerlugit akissarsitinneqartalissasut.
Aningaasaqarnermut Akileraartarnermullu Naalakkersuisoq Aqqaluaq B. Egedep siunnersuutitut saqqummiussaa, tusarniaavigineqarnerminiillu malunnaatilimmik allannguuteqareerpoq.
Pilersaarutaangaluartoq
Pilersaarutaasimangaluarpoq siulersuisuni ilaasortanngortup, Henrik Lethi ajunngitsorsiassinneqartariaqalertoq, kisimi taarsissangaa, tamannalu kattuffik KNAPK-miit ilaasortanngortup Tønnes Berthelsenimut pitsaanerpaasimassangaluarpoq.
Kisiannilu inatsissatut siunnersuummi, Inatsisartut ukiaanerani ataatsimiinnerminni aalajangiuffigisassaanni erserpoq siulersuisuni ilaasortat tamarmik immikkut akilerneqassasut. Siullermik taakku akilerneqartussaasimanngikkaluarput.
Upernaarmanna Sermitsiaq.AG-p oqaluttuaraa inatsisssatut siunnersuusiornermi inuk ataasiinnaq kisimi (Tønnes Berthelsen aaqq.) akilerneqassasoq. Taamatullu eqqarsarsimangaluarneq siulersuisuni siulittaasup Sermitsiaq.AG-mut oqaaseqarnerata kingorna naalakkersuisoqarfiup Aqqaluaq B. Egedellu isumaannik allannguisimangunarput.
Aamma atuaruk: Naatsorsueqqisaartarfimmi siulersuisut ajunngitsorsiaqartinneqaleriasaartut
Ulloq 9. maj siulersuisuni siulittaasoq Vøgg Løwe Nielsen oqarpoq:
- Isumaga naapertorlugu siulersuisunut ilaasortat tamarmik suliaminni ajunngitsorsitinneqarnissaat naapertuutissaaq, ilaasortammi suliffitsik sinnerlugu ilaasortaanatillu sunngiffimminni ataatsimiinnissaminnut piareersartarput. Ilaasortat ataatsimiinnerni tamani peqataalluartarput, naatsorsoqqissaakkallu nutaat piareersarneqalernerini immikkoortuni immikkut ilisimasatik atugassanngortillugilluunniit, pineqartuni immikkut ilisimasalinnik ikiuussinnaasunut innersuussisarput, Vøgg Løwe Nielsen Sermitsiaq.AG-mut oqarpoq.
Ukiumut aningaasartuutit 140.000 koruunit
Inatsisissatut siunnersuummi oqaaseqaammi erserpoq siulersuisuni ilaasortat – katillugit sisamat – annerpaamik 35.000 koruuninik akilerneqassasut. Tassa Leth-imik soraarsitsisimaneq Naatsorsueqqissaartarfimmut ukiumut 140.000 koruuninik naleqaleriaannaavoq.
Oqaaseqaammilu aamma erserpoq, naalakkersuisoqarfiup akissarsititseriaatsimut maleruangassat, Kalaallit Nunaata Radioani (KNR) siulersuisuni ilaasortaanut atuuttoq, assigilissagaa.
Ullumikkut siulersuisuni ilaasortat
Siulersuisuni ilaasortat
- Vøgg Løwe Nielsen (siulissaatoq)
- Kim Neumann Nielsen (siulittaasup tullia)
- Tønnes Berthelsen
- MîtdlâraK Lennert
- Lulu Nielsen