Inatsisitigut ataataqanngitsut utaqqiumajunnaarlutik danskit naalagaaffiat eqqartuussivimmut tunniunniarpaat
Inatsisitigut ataataqanngitsut 50-it sinneqartut danskit naalagaaffiat sapaatip akunnerata tulliani eqqartuussisunut sassartinniarpaat, KNR taama allaaserisaqarpoq.
Inatsisitigut ataataqanngitsut amerlasuut taarsiinissamut tunngatillugu naalagaaffiup kajumissutsiminik aalajangiinissaa utaqqiumajunnaarpaat.
Naalagaaffik eqqartuussivimmut maanna sassartinniarpaat, Klaus Frederiksen, inatsisitigut ataataqanngitsut sinnerlugit oqaaseqartartoq KNR-imut oqaluttuarpoq:
- Tassa peqqutaavoq naalagaaffiup uagut immikkoortilluta iliuuserisimasai akuerisinnaannginnatsigu, taamaattumik tassa aalajangersimavugut suliakkiissuteqarniarluta, Klaus Frederiksen oqarpoq.
Tusagassiorfik naapertorlugu inatsisitigut ataataqanngitsut 50-it missaanniittut eqqartuussivimmut sassartitsinermut peqataapput.
Inatsisitigut ataataqanngitsunut immikkut 125.000 kr piumasarigaat
Taakku danskit naalagaaffiannit immikkut 125.000 koruunimik taarsiiffigineqarnissartik siorna juunimi piumasaqaatigigaat saqqummiunneqarpoq, naalakkersuisulli piumasaqaammut suli qisuarianngillat.
Inatsisitigut ataataqanngitsut maani nunatsinni ataataminnik ilisimanninnissamut pisinnaatitaaffeqanngitsunut taaguutaavoq. Meeqqat qallunaat 1938-mili ataataminnik ilisimanninnissamut pisinnaatitaaffeqalerput, naak katisimanngitsunit qitornarineqaraluarlutik, kalaallit meerartaat aatsaat 1963-imi taamatut pisinnaatitaaffeqalerput. Avannaani Tunumilu meeqqat 1974 tikillugu inatsisitigut ataataqanngitsuusinnaasimapput.
Eqqartuussissuserisoq, Mads Pramming, meeqqanik misiligutaasimasunik suliamik ingerlatsinikoq eqqartuussivimmi suliamik isumaginnittuussaaq.
