angalaneq
Inatsisit pitsaanerulernissaat Siumumit IA-miillu suli sulissutigineqarpoq
Folketingimi Kalaallit Nunaat pillugu ataatsimiititaliami ilaasortat tikeraarnerat Siumumit IA-miillu iluarusuutigineqarpoq
Folketingimi ilaasortaq Inuit Ataqatigiinnilu siulittaasoq Sara Olsvig Folketingimi Kalaallit Nunaat pillugu ataatsimiititaliaani ilaasortaasut Nunatsinni angalaqatigeeqqammernerat nuannaarutigaa.
Tusagassiutinut nalunaaruteqarpoq.
Illoqarfiit nunaqarfiillu assigiinngitsut ataatsimiititaliami ilaasortaasunit tikinneqarput. Kalaallit Nunaanni aningaasat amerlavallaanngitsut atorneqartarnerat suliffeqarfinnullu tamanna qanoq sunniuteqartarnersoq angalaqatigiinnermi ersersinniarneqarpoq. Politiit, eqqartuussiviit parnaarussiviillu aamma sammineqarput angalaqatigiinnermi.
- Pingaaruteqarpoq danskit politikkeriisa Kalaallit Nunaanni atugassarititaasut qanoq isikkoqarnersut paasitissallugit, tassani unammillernarsinnaasut iluaqutigineqartartullu aamma takutissallugit pingaaruteqarpoq. Pisinnaatitaaffiit arlaqartut Danmarkip ataaniipput suli. Taamaattumik tamakku danskit suleqatiginerisigut atugassaritinneqartut takutinneqartariaqarput. Illoqarfinni mikinerusuni takusatik paasisaqarfigigunarpaat, Sara Olsvig oqarpoq.
Assigiinngitsut takornariarneqartut
Qasigiannguaniinnerminni Royal Greenland takornariarneqarpoq. Ilimanami Kitsissuarsunnilu tikeraarnermi nunaqarfinni aqutsisarnerit paasititsiniaaffigineqarput.
Aamma Kalaallit Nunaanni isertitsiviit assigiinngitsut takornariarneqarput, soorlu ilaatigut Ilulissani ulluinnarni sulerisoqartarnersoq paasitinneqarput, kiisalu suut pitsaanerulersinnaanersut aamma eqqartorneqarlutik.
Inatsisit pitsaanerusut
Doris Jakobsenip Karen Hækkerupimik oqaloqateqarsimanera Sermitsiaq.AG-mi allaaserineqareerpoq, tassani politiit aningaasarsiaat qaffanneqarsinnaanersut apeqqutigineqarluni.
- Eqqartuussiveqarnermi pissutsit ukiuni 20-ni kingullerni allanngortoqarnikuunngitsoq paasereerparput, tamanna pitsaanerusariaqarpoq. Eqqartuussissuserisut Kalaallit Nunaanni amigaatigineqarput. Atorfiit soqutigissarneqarnissaat sulissutigissavarput, Doris Jakobsen oqarpoq.
Inatsisilerinermut ministerimut aamma apeqquteqarpoq, tassani eqqartuussissuserisunut ilinniarfiliortoqarsinnaaneranik ammaassinissaq apeqqutigineqarluni.