Inatsisit Kielsen nutaanik biilitaanngitsoortissinnaanngilaat
Biilimik nutaamik 700.000 aamma 900.000 koruunit akornanni akilinnik Kim Kielsenimut pisisoqarsinnaanngilaq. Kisianni biilinik pisoqaanerusunik 375.000 koruunit missaannik akilinnik pisisoqarsinnaavoq, naak biilit nalinginnaasumik nutaatut pisiarineqartarnissaat inatsisitigut aalajangersarneqarsimagaluartoq, naalakkersuisoqarfimmi pisortaq oqarpoq.
Naalakkersuisut Siulittaasuata Naalakkersuisoqarfiata isumaliutigineqartutut ilisimatitsissutigigaluagaatut, biilinik 1 millionit koruuninik akilinnik Kim Kielsenimut pisisoqassagaluarpat, Namminersorlutik Oqartussat nammineq inatsisaannik unioqqutitsinerussagaluarpoq.
Namminersorlutik Oqartussat atorfimmut atatillugu biilinik pisisarnermut inatsisaannik Sermitsiaq.AG allagaatinik paasitinneqarnerani tamanna atuarneqarsinnaavoq. Inatsisit kaajallaatitami atuarneqarsinnaapput, taanna Kim Kielsenimit aggustimi 2016-imi atsiorneqarsimavoq.
Kaajallaasitami paragraf 1-imi allassimavoq, qitiusumik allattoqarfiup atorfimmut atatillugu biilimik 375.000 koruuninik akilimmik pisisoqarsinnaasoq.
Biilit pisiarineqarnerminni nalinginnaasumik nutaajusassasut kaajallaatitami aamma allaqqavoq, kisianni piumasaqaataanngilaq. Taamaammat biilinik pisoqaanerusunik, soorlu assersuutigalugu Toyota Land Cruiserimik pisoqaanerusumik, Kim Kielsenip pigerusutaanik pisisoqarsinnaavoq, naalakkersuisoqarfimmi pisortaq nassuiaavoq.
Iluarsaanneqarneri akisuut
Naalakkersuisut siulittaasuata Kim Kielsenip naalakkersuisutut biiliata iluarsartuunneqarnerat ukioq manna aamma Namminersorlutik Oqartussanut annertuumik akiliuteqartitsimaneranik Sermitsiaq.AG-p qanittukkut oqaluttuarnerata kingorna, apeqqut maanna soqutiginarseqqippoq.
Ukioq manna qaammatini qulingiluani siullerni biili 118.085,81 koruuninut iluarsartuunneqarput. Ukiup siuliani iluarsartuunneqarnerat 141.187,90 koruuneqarpoq.
Naalakkersuisut Siulittaasuata Naalakkersuisoqarfiani pisortap, Hans-Peder Barlach Christensenip, tassunga atatillugu iluarsartuussinissaq biilimik nutaamik pisinermit pitsaanerussasoq nammineq nalilersimallugu nassuiaavoq.
- Land Cruiserimik nutaarluinnarmik assingusumik 7000.000 aamma 900.000 koruunit akornanni akilinnik imaluunniit motoorimik nutaamik pisissanerluta isumalutersuuteqarnikuuvunga. Motoorip taarserneqarnissaa aalajangerpara, naalakkersuisoqarfimmi pisortaq oqarpoq.
Politikerit kissaateqarsinnaapput
Maannali naalakkersuisoqarfimmi pisortaq allatut nassuiaateqarpoq.
Naalakkersuisoqarfik soorunami akinut killigititap iluani pisinissaq malikkumaaraat Hans-Peder Barlach Christensen Sermitsiaq.AG-mut oqarpoq, oqaaseqarnerlu ima paasineqassasoq, Land Cruiserimik atornikumik 700.000 aamma 900.000 koruunit akornanni akeqarsimasumik pisinissaq isumaliutigineqarsimasoq.
- Politikerit kissaateqartarput, uagullu sinaakkutit malillugit piviusunngortinniartarpagut, Hans-Peder Barlach Kristensen oqarpoq.
Biili atornikoq akikitsumik 250.000 koruuninik akilerlugu pisiarineqarsimasoq isumaqarpoq, tamannalu aamma Kielsenip biiliata suliarineqaqattaarsimaneranut ilaasariaqartoq.
Nutaajunissaat piumaqaataanngitsoq
Akerlianik biili ukiunik 14-nik pisoqaassuseqarami nutaajunngilaq, Namminersorlutik Oqartussallu 2016-imi Kielsenimut pisiarimmassuk nutaajunngilluinnarluni.
Taamaakkaluartoq biilit tassunga assingusut inatsisit atuuttut atorlugit pisiareqqinneqarsinnaasut, naalakkersuisoqarfimmi pisortaq naliliivoq, naak kaajallaasitami allaqqagaluartoq ”atorfimmut atatillugu biilit nalinginnaasumik nutaatut pisiarineqartassapput”.
Tamanna piumasaqaataanngilaq, Hans-Peder Barlach Kristensen oqarpoq.