Skip to main content

Inatsisissatut siunnersuut: Tunisiumatussuseq akissarsissutigineqartassaaq

Innuttaasut peqatigiiffimmut ajunngitsuliortumut aningaasanik tunniussisut Nunatta Karsianit tapiissuteqarnikkut akissarsisinneqartassapput. Inatsisissatut siunnresuummi nutaami juullinngitsiartoq tusarniaassutigalugu nassiunneqarsimasumi taamatut allassimasoqarpoq.

Inatsisissatut siunnersuut nutaaq naapertorlugu, ”innuttaasut akileraarutimi ilaat sumut atorneqarnissaannut sunneeqataasinnaassasut”, inatsisissatut siunnersuummi decembarip 22-ani tusarniaassutigalugu nassiunneqarsimasumi allassimavoq.

- Innuttaasut taamaalillutik peqatigiiffinnut akuerisanut akiliuteqarsinnaalissapput innuttaasut namminneq aalajangiillutik, taamaalereerpallu innuttaasoq akileraarutinik isertitanit aningaasalersukkamik taperneqarsinnaalissalluni, Aningaasaqarnermut Naalakkersuisoqarfiup inatsisissatut siunnersuutaanut nassuiaammi allassimavoq.

Siunertaq

Taamatut nutaamik aaqqissuussinermi siunertarineqarpoq, Kalaallit Nunaanni inuiaqatigiinni pinaveersaartitsinerup atugarissaartuunerullu qitiutinneqarnissaat.

- Akuerisamut peqatigiiffimmut tapiissuteqarnikkut innuttaasut kalaallini inuiaqatigiinni iluaqutaasutut isigisaminnut immikkut ittumik tapiinissaminnut toqqaasinnaalerput, inatsisissatut siunnersuummut nassuiaammi allassimavoq.

Tassani pineqarpoq, peqatigiiffittut akuerisaasumut 1.000 koruuninit amerlanerusunik 2.500 koruunillu angullugit tapiissuteqarnikkut Namminersorlutik Oqartussanit tapiissutisisinnaanngornissaq. Katillugit 1.000 aamma 2.500 koruunit akornanni tapiissutigineqartut 25 procentii tunniunneqartassapput.

Tapiissutit annertussusaat

Innuttaasoq aalajangerpat peqatigiiffimmut 2.500 koruuninik tunniuniarluni, innuttaasoq pineqartoq ukiup tulliani 625 koruuninik tapiiffigineqartassaaq, taamalu peqatigiiffimmut aningaasanik tunniussinermi - tapiissuteqartoq naggataatigut 1.875 koruuninik aningaasartuuteqassalluni.

- Peqatigiiffinnut tapiissutinut allannguutissatut siunnersuut Kalaallit Nunaanni inatsimmut nutaamut ilanngussaavoq, siornatigut taama ittumik tapiissuteqarnissamut periarfissaqarsimanngimmat,  Aningaasaqarnermut Naalakkersuisoqarfimmit ilisimatitsissutigineqarpoq.

Aaqqissuussap nutaap allaffissornikkut kinguneqqatissai qularnartupilussuupput.

- Siunnersuut ukiumut sulisut x-it, aningaasartuutinngorlugu xx kr.-t, allaffissornikkut kinguneqassasoq naatsorsuutigineqarpoq. Siunnersuut aamma akileraartarnermut ingerlatsiviup IT-mik atortuinik alliliinissamik imaqarpoq, taamaaliornermi peqatigiiffinnit nalunaarutit innuttaasunillu qinnuteqaataannik tunniussinissamut sullissinermi aqussinnaaniassammagu. Aningaasartuuteqarneruneq xxx kr.-t missaanniissasut naatsorsuutigineqarpoq, Aningaasaqarnermut Naalakkersuisoqarfik ilisimatitsivoq.

Millionit angullugit aningaasartuuteqarnerunissaq

Tapiissuteqartarnissamilli aaqqissuussaq Nunatta Karsianut annertuumik aningaasartuutaasassaaq.

- Tapiissut ukiumut 1 million koruunit missaannik aningaasartuutit ilanerannik naatsorsuutaavoq, tassa innuttaasut 15 %-ii ukiumut agguaqatigiissillugu 1.500 koruuninik peqatigiiffinnut akiliuteqartarsimassappata.

Aaqqissuussamut nutaamut allaffissornermullu akisusussamut nassuiaatigineqarpoq:

- Peqatigiiffimmut tapiissutit annertussusaat innuttaasup aningaasarsiaanut ilanngaataannullu attuumassuteqassanngillat, taamaalillunilu innuttaasut isertitakitsut akunnattumillu isertitallit isiginiarneqarnerussallutik akileraarutinut ilanngaammit annermik.

Siunnersuut akuerineqassappat pilersaarutaavoq, Akileraartarnermut Aqutsisoqarfiup ukiut tamaasa peqatigiiffinnik akuerisaasunik allattuisarnissaa. Erseqqissaatigineqarpoq peqatigiiffiit aaqqissuussami ilaatinneqanngitsut ilaatigut tassaasut upperniaqatigiit politikikkullu partiit.

Inatsisissatut siunnersuut 2023-miit atuutilersinneqassaaq, siunnersuummi allassimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER