Inatsisissatut siunnersuut: Kukkunersiuinermut Ataatsimiititaliaq uppernarsaatinik pissarsisinnaassaaq
Kukkunersiuinermut Ataatsimiititaliaasimasup nipisaat suaannik suliamut atatillugu uppernarsaatinik pissarsiniarneq ajornartissimavaa. Inatsisartullu Siulittaasusata inatsisissatut siunnersuusiaatigut tamatuma peqqinnginnissaa maanna qulakkeerneqassaaq.
Hans Enoksenip nalakkersuisuni inatsisit eqqarsaatigalugit isornarsinnaasunik pisoqaraangat, paasissutissanik suliamut attuumassuteqartunik naalakkersuisut tunniussisinnaasannginnerat naammagilersimavaa. Inatsisissatut siunnersuut aqqutigalugu, Inatsisartut Kukkunersiuinermut Ataatsimiititaliaata paasissutissanik Naalakkersuisunit sukkulluunniit pissarsisinnaanera qulakkeerniarpaa.
- Kukkunersiuinermut Ataatsimiititaliap piginnaatitaanera aamma paasissutissanik atortussanillu pissarsisinnaatitaanera eqqarsaatigalugit nalorngissuteqarnerit suugaluartulluunniit naleqqutinngilluinnarput, nakkutilliisussaatitaaneq ataatsimiititaliap isumagisassarisaa taamatullu aamma Inatsisartut Naalakkersuisullu akornanni ingerlalluartumik suleqatigiinnissaq eqqarsaatigalugit, Inatsisartut Siulittaasuat inatsisissatut siunnersuummini tunngavilersuivoq.
Naalakkersuisut Kim Kielsenip 2020-mi angallamminik ikinngumminut attartortitsigami, aningaasannaffigisaminik, nipisattassiissutinik qaffaaqataagami suliamut attuumassuteqarpallaarsimanersoq eqqartuussissuserisumut misissotippaat. Peqatigitillugu Kukkunersiuinermut Ataatsimiititaliaq Inatsisartunilu ilaasortat allat nipisattassiissutinut tunngatillugu suliamut uppernarsaatinik siulittaasoqarfik pissarsisinnaasimanngilaq.
Atortussanik pissarsinissamut qinnuteqartoqartariaqanngitsoq
Kukkunersiuinermut Ataatsimiititaliap misissuisimanerit nunap aningaasaqarneranut sunniuteqarsinnaasut tamaasa suliarisinnaasariaqarpai.
Tamanna pissaaq Kukkunersiuinermut Ataatsimiititalip suliassai pillugit inatsisip allanngortinneratigut.
- Ataatsimiititaliaq tamatuma saniatigut qaqugukkulluunniit ingerlatsinermik kukkunersiuinermik aallartitsiinnarani oqaluuserinniinnarluniluunniit, kisianni aamma inatsisit eqqarsaatigalugit isornarsinnaasunik kukkunersiuilluni misissuinernik aallartitsillunilu oqaluuserinnissinnaasoq, inatsisissatut siunnersuummut erseqqissaassutigineqartoq taamatut allassimavoq.
Ataatsimiititaliaq inatsisit eqqarsaatigalugit isornarsinnaasunik iliuuseqartoqarsimaneranik misissuisinnaanermi saniatigut suliap misissornissaanut uppernarsaatinik Naalakkersuisunit qinnuteqaqqaartariaqassanngillat.
Uppernarsaatinik ajornannginnerusumik pissarsisarnissaq
- Ataatsimiititaliap kukkunersiuisoq Inatsisartut toqqagaat tamatuminnga qinnuiginngikkaluarlugu atortussanik pissarsiniarsinnaatitaanera Nunatta Karsiata naatsorsuutaanik taakkununngalu kukkunersiuisup oqaaseqaataanik ataatsimiititaliap ukiumoortumik misissuataarineranut atuuttoq taamatullu aamma ingerlatsinermik kukkunersiuilluni misissuinerit aamma inatsisit eqqarsaatigalugit isornarsinnaasunik kukkunersiuilluni misissuinerit ataatsimiititaliap aallartitai oqaluuserisaaluunniit eqqarsaatigalugit atuulluni.
Nipisattassiissutinut atatillugu suliatut ittumik pisoqaqqinnginnissaa qulakkeerniarlugu, Inatsisartut Naalakkersuisullu aalajangertassavaat, Kukkunersiuinermut Ataatsimiititaliap nunatta karsiata naatsorsuutaanik Naalakkersuisunullu oqaaseqaatinik misissuisarnissaa.
Inatsisissatut siunnersuut septembarip 30-ani siullermeerlugu suliarineqassaaq, oktobarillu 27-ani inaarutaasumik suliarineqassalluni.