Inatsisissatut siunnersuuteqarnikkut Nukissiorfiit siulersuisoqalersinneqassapput
Siulersuisut Nukissiorfiit aqunneqarnerat nukittorsarlugulu ingerlatseqatigiiffiup aningaasatigut ajornartorsiuteqarnera ikiorsiiffigissavaat.
Nukissiornermik pilersuinermillu ingerlatseqatigiiffik Nukissiorfiit ukiuni kingullerni naatsorsuutitigut amigartooruteqarujussuartarpoq, tamatumalu saniatigut miliardilippassuarnik nalilimmik aaqqiissutissarsineqartussamik aserfallatsaaligassatigut kinguaattooqqalluni.
Nukissiorfiit nammineertitatut Namminersorlutik Oqartussanit suliffeqarfiutigineqarpoq. Tamatuma malitsigisaanik Naalakkersuisut aqutsisussanik toqqaasarput, suliffeqarfillu politikkikkut toqqaannartumik aqunneqarluni kiisalu Nunatta Karsiat suliffeqarfimmut toqqaannartumik aningaasaliisarluni.
Maannalu aqutsisut Naalakkersuisunilu politikkerit akornanni suliffeqarfik siulersuisulerneqarnissaa anguniarneqarpoq, tamanna inatsisissatut siunnersuummi Naalakkersuisut tusarniaassutigisaanni atuarneqarsinnaavoq.
Aningaasanik nammineerluni atugassiisinnaasassasoq
Naalakkersuisut naapertorlugit, siulersuisoqalersitsiniarnermi siunertarineqarpoq, "Naalakkersuisut aamma Nukissiorfiit akornanni pisariinnerusumik suliassat agguarsimanissaasa qulakkeerneqarnissaat."
- Naalakkersuisut Nukissiorfiit ingerlataannut nukissiornermut politikkikkut killissaliussanik aalajangersaasarnerat ingerlaannassaaq, Nukissiorfiit killissaliussat taakkua iluanni suliffeqarfimmi aningaasaqarnikkut sunniuteqarluartumik ingerlatsinissaq siunertaralugu nammineerluni atugassiisinnaassalluni, Naalakkersuisut siunnersuut pillugu allapput.
Nukissiorfiit siulersuisoqalersinneqarnissaannik siunnersuut aamma Nukissiorfiit aningaasatigut ingerlatsinerannik kukkunersiuinermi ilanngunneqarsimavoq.
Kukkunersiuinermi ilaatigut inerniliunneqarsimavoq, Nukissiorfiit annertuumik amigartooruteqarluni ingerlanera aamma milliardilikkaanik kinguleruttoornera, akinik assigiissitsilluni aaqqissuusseqqinnerup nalinginnaasumillu aserfallatsaaliinissamut aningaasaliinikinnerup kingunerigaa. Taamaammallu ingerlatseqatigiiffiup ajornartorsiut aaqqinniarlugu akit qaffanneqartariaqarpai, imaluunniit nunatta karsianiit aningaasaliissutit qaffanneqartariaqarput.