Inatsisinik unioqqutitsisoqarneranik isornartorsiuisoqarnerata kingorna naalakkersuisoq siunersiuinissamut aggersarneqarpoq
Sivikitsumik piffissalerlugu kalerriuteqarluni Aalisarnermut Piniarnermullu Naalakkersuisoq ullumi sisamanngornermi ualikkut ammasumik siunersiuinissamut aggersarneqarpoq. Taassuma ilaatigut ombudsmandimit sakkortuumik isornartorsiuineq pillugu apeqqutit akissuteqarfigissavai.
Piniarnermut Aalisarnermullu Naalakkersuisoqarfiup ataatsimoorluni tikaagullinniarnissamut pisassiissutit suliat pillugit inatsisit malissimanngimmagit, ombudsmandip Vera Lethip ''ernumanartuusoq ajornartorsiuterujussuusorlu'' ataasinngormat oqaatigaa.
Piniarnermut aalisarnermullu naalakkersuisoq, Karl Tobiassen (S), sisamanngornermi Aalisarnermut, Piniarnermut Nunalerinermullu Ataatsimiititaliamit suliaq pillugu aggersarneqarpoq.
Tassami ataatsimiititaliap naalakkersuisoq sivikitsumik piffissalerlugu kalerriuteqarluni ammasumik siunersiuinissamut aggersarpaa, ataatsimiititaliami siulittaasoq Hans Aronsen (IA) tusagassiuutinut nalunaarummi ilisimatitsivoq:
- Aalisartut piniartullu Naalakkersuisoqarfimmut saaffiginnissutaat pillugit Aalisarnermut Piniarnermullu Naalakkersuisoqarfiup kiisalu Naalakkersuisup qisuariarnerat pillugit ombudsmandip isornartorsiuineranut siunersiuinissaq tunngassuteqarpoq, ataatsimiititaliami siulittaasoq allappoq.
Siunersiuineq nal. 14. aallartissaaq, ataatsimiititaliallu makku eqqartorusuppai:
- Ombudsmandip Aalisarnermut Piniarnermullu Naalakkersuisoqarfimmut isornartorsiuinera Tikaagullittassanik ataatsimoorluni pisassanik qinnuteqaatinut itigartitsisaqattaarnerit pillugit Ombudsmandip Aalisarnermut Piniarnermullu Naalakkersuisoqarfimmut isornartorsiuinera pillugu Aalisarnermut Piniarnermullu Naalakkersuisoq ataatsimiititaliamit oqaaseqartikkusunneqarpoq.
- KNAPK-mit saaffiginnissutit suliarineqarneri KNAPK-mit oqaatigineqartoq una pillugu Aalisarnermut Piniarnermullu Naalakkersuisoq qanoq isumaqarnersoq ataatsimiititaliamit paasissutissiissutigeqquneqarpoq: - Naalakkersuisumut allagaqarput tatiginnikkunnaarnerpullu nalunaarutigalugu. Aalisarnermut, Piniarnermullu naalakkersuisoqarfimmut arlalippassuariarluta saaffiginnissutinik allattuartaraluarpugut akineqanngisaannarpugulli, taamaattumik tatiginnikkunnaarluta nalunaarfigaagut.
Sermitsiaq.AG-p siunersiuineq malinnaaffigissavaa.
