Inatsisinik atuutsitsinermut ministeri: Tigummigallagassat Danmarkimukartittannginnissaat angusaq pitsaasuuvoq
Piffissaligaanngitsumi pineqaatissinneqarlutik tigummigallagassanngortinneqartut Kalaallit Nunaanneersut Nuummi pineqaatissinneqarsimasut inissiisarfianni nutaamiitinneqartarnissaannut inatsisissatut siunnersuut, Folketingimi ilaasortat isumaqatigiittut ullumi akuersissutigaat.
Kalaallit Nunaanniit piffissaligaanngitsumi tigummigallagassanngortinneqartut Herstedvesterimut aallartinneqartarunnaassapput. Taama pisoqassasoq ilisimaneqareerpoq, Folketingimili ilaasortat isumaqatigiittut inatsisissamut siunnersuut, kalaallit piffissami aalajagingaanngitsumi tigummigallarneqartussat Nuummi pineqaatissinneqarsimasut inissiisarfissaanni nutaamiitinneqartalernissaannut tunngasoq, ullumi akueraat.
- Kalaallit Nunaata Danmarkillu akornanni suleqatigiinnermi angusaq kusanarpoq, erniinnaarannguarmi taasilerutta ukiuni kingullerni 60-ini periusiusimasoq, tassa Kalaallit Nunaanni tigummigallagassanngorlugit pineqaatissinneqartut, ilaquttatik attaveqarfigisatillu qimallugit Danmarkiliartinneqartarnerat, atorunnaarsissavarput, inatsisinik atuutsitsinermut ministeri, Søren Pape Poulsen (K), siunnersuutip inaarutaasumik oqaluuserineqarnerani oqarpoq.
- Tamanna maani suliaqartugut tamattaalluta ataqqinaatitut tigussavarput.
Peqqissimisinnaatitaaneq
Inatsisip ilanngullugu nassuiarpaa, maanna Herstedvesterimi piffissaligaanngitsumi tigummigallagaasut qanoq nunatsinni pineqaatissinneqarsimasut inissiisarfiannut nuutsinneqassanersut. Siullermik pineqaatissinneqassasut namminneerlutik aalajangissavaat Herstedvesterimiiginnarusunnerlutik, imaluunniit Nuummut nuutsinneqassanerlutik. Aappaattut aalajangerneqarpoq, Nuummut nuukkusullutik aalajangertut peqqissimisinnaatitaassasut, tassa imaappoq Nuummut nuutsinneqartut ukiup affaata iluani peqqissimissagunik Herstedvesterimut uteqqinnissaminnut periarfissinneqassasut.
Kalaalimerngit illersuisussaatitaasullu
Siunnersuutigineqartup suliarineqarnerani ilanngullugu qulakkeerneqarpoq Herstedvesterimiiginnarusuttut kalaaliminernik suli nerisaqarsinnaassasut taamatullu kalaallisut atuartinneqartaannassasut.
Suliap naammassilernerani akuerisanut ilanngutsinneqarpoq kalaallit isertitsivimmiittut illersuisoqarsinnaanerannut periarfissaqartinnissaat. Siunnersuummut ilaasoq peerneqartussatut siusinnerusukkut isikkoqarsimagaluarpoq.
- Kalaallit Nunaat tamassuminnga tunisariaqarparput, kalaallillu pineqaatissinneqarsimasut Danmarkimiinnissaminnik aalajangiisinnaatitaasimanngitsut aamma taamaasiortariaqarpagut, immikkut neqeroorutigineqartup attatiinnarneqarnissaanut Søren Pape Poulsen taama tunngavilersuivoq.
Siunnersuutip suliarineqarnerani ministeri folketingimi ilaasortat oqaaserisaannut tusarnaarsimammat, taamatullu kalaaliminertorsinnaanerup qulakkeerneqarnera anguneqarsimammat, Aaja Chemnitz Larsen (IA) inatsisinik atuutsitsinermut ministerimut qujassuteqarpoq.