Inatsisilerituut: Birna pillugu suliami eqqartuunneqarsimasup tigusarineqarnera inatsimmik unioqqutitsineruvoq

Islandimi inatsisilerituut marluk inatsisilerituut atuagassiaanni Tímarit lögfræðingarimi ilanngutassiaminni oqaatigaat, Birna pillugu suliami toqutsisimasutut pasineqarttoq Thomas Møller nunat tamat inatsisaat unioqqutillugu tigusarineqarsimavoq. Taamatut allappoq aviisi Frettabladid.

Inatsisilerituut taakku marluk isumaqarput, Birna Brjánsdóttir Reykjavikimi Islandimiittumi toqutaasimatsiarnerata kingorna, Islandimi oqartussat kalaallit kilisaataataannut Polar Nanumut ikillutik Thomas Møllerimik 2017-imi januaarip qaammataani tigusarinninnissamut piginnaatitaaffeqarsimanngitsut.

Professorip Bjarni Már Magnússonip ilanngutassiami erseqqissaatigaa, suliaq pineqartoq Islandimi eqqartuussisarnerup oqaluttuarisaanerani inatsisinik atuutsitsilluni suliani ilungersunarnerpaat ilagigaat.

- Nunat assigiinngitsut inatsisaanni immikkuualuttorpassuit tunngaviusut matumani unioqqutinneqarsimapput, isumarpullu malillugu eqqartuussivinnit tamanna iluatsillugu suliarineqarsimanngilaq, inatsisilerituunit ilaatigut oqaatigineqarpoq.

Kinguneqartitsisoqarsimannginnera tupigusuutaasoq

Ilanngutasseeqataasimasup aappaata Hlín Gísladóttirip Sermitsiaq.AG-mut oqaluttuaraa suliaq nammineq aamma soqutiginartissimallugu, taamaammallu pisisimasut erseqqinnerusumik misissuiffiginiarlugit professorimik suleqateqalersimalluni. Inatsisilerituut taakku marluulluik oqartussat eqqartuussiviillu isornartorsiorpaat.

Eqqartuussummik suliarinnittoqaqqimmat inerniliunneqarpoq, tigusarinninneq nunat tamat inatsisaannik unioqqutitsinerusoq, tassa Islandimi oqartussat Islandip oqartussaaffiata avataani tigusarinninnissamut danskit kalaalilluunniit oqartussaannik isumaqatigiissuteqarsimanngimmata.

- Suliamut atatillugu kinguneqartitsisoqarsimannginnera annertuumik tupigusuutigisimavarput, Hlín Gísladóttir oqarpoq.

Tigusarinninniarnerup nalaani isumaqatigiissutigineqarsimavoq, umiarsuaq alapernaarsuut Triton Kalaallit Nunaanni politiinik ilaasoqarluni Danmarkimit Islandiliartinneqassasoq. Tamannali suli pinngitsoq pilersaarut allanngortinneqarsimavoq, taamalu Islandimi politiit kilisaammut Polar Nanumut ikillutik Thmoas Møller Olsenimik tigusarinnissimallutik.

Tigusarinninnissamut pisortatigoortumik akuersisoqarsimanngitsoq

Ilanngutassiami pingaarnertut inerniliunneqartoq tassaavoq, naalagaaffiit immikkut ittumik pisoqartillugu umiarsuarmut imaannaaniittumut tunngatillugu inatsisitigut oqartussaaffeqartarnerat.

Tamannali avaqqunneqarsinnaavoq. Pingaarnerpaarli tassaavoq, umiarsuit sorsuutit, sakkutuut timmisartui imaluunniit umiarsuit timmisartullu aalajangersimasumik ilisarnaatillit imaani umiarsuarmut ikinissamut pisinnaatitaaffeqarnerat, matumanili nunat tamat inatsisaat kisiat tunngavigalugu taamaaliorsinnaapput, tassa assersuutigalugu inerteqqutaasumik assiliisoqarneranik, inussianik tuniniaasoqarneranik imaluunniit inerteqqutaasumik radiukkut aallakaatitsisoqarneranik aatsaat pasitsaassisoqarsimappat.

Ilanngutassiami atuarneqarsinnaavoq, Islandip Danmarkillu Kalaallilluunniit Nunaata isumaqatigiissuteqarfigisimanngikkaat, angallammut nunat tamat imartaanniittumut ikisoqarnissaa.

Tassa Thomas Møller Olsenimik tigusarinninnertut ittut Kalaallit Nunaanni Danmarkimiluunniit oqartussanit akuerineqaqqaartussaapput.

- Suliamik saqqummiussissut naapertorlugu pisortatigoortumik akuersissuteqartoqarsimanngilaq, Hlín Gísladóttir oqarpoq.

Ilanngutassiami inerniliunneqartoq tassaavoq, Polar Nanumi tigusarinninneq inatsimmik unioqqutitsinerusoq.