Inatsisilerituut naliliipput: Kalaallit Nunaat nammineerluni nunanut allanut tunngasunut politikkeqarsinnaavoq

Kalaallit Nunaat suliassaqarfinni nammineq akisussaaffigisamini nammineerluni nunanut allanut tunngasunut politikkimik suliaqarsinnaavoq. Inatsisilerituut, nunarsuaq tamakkerlugu eqqartuussissuserisoqarfimmiit, DLA Piperimeersut, Per Vestergaard Pedersen aamma Christina Keis Nielsen taama naliliipput.

Naliliineq immikkut maluginiangassaavoq, danskimmi naalakkersuisuisa taarsertarnerminni aalajangiusimasaannit killormorluinnaq naliliisoqarpoq. Siornatigut oqaatigineqartaraluarpoq Kalaallit Nunaat nunanut allanut tunngasunut nammineq politikkeqassaguni, taava tunngaviusumik inatsit allanngortinneqaqqaartariaqartoq.

Tassunga Per Vestergaard Pedersen aamma Christina Keis Nielsen isumaqataanngillat.

- Naalagaaffeqatigiinnerup iluani namminersornerunerullu iluani nammineernerunissamut tunngavissaqarluartoq isumaqarpugut. Uagut isumarput malillugu Kalaallit Nunaat nunanut allanut tunngatillugu nammineq aalajangiisinnaassuseqarpoq, suliassaqarfinni tigusimasamini, nutaarsiassiissummi allaatigisaqarput.

Nunanut allanut tunngasunut politikkit ataatsimit amerlanerusut

Inatsisilerituummi naliliinerat naapertorlugu, Tunngaviusumik inatsimmi Kunngeqarfiup iluani ataasiinnarmik nunanut allanut tunngasunut politikkeqassasumik allaqqasoqanngilaq.

- Uagut isumaqarpugut Kunngeqarfik Danmark ataasiinnarmik nunanut allanut tunngasunut politikkeqarsinnaasoq, nunanut allanut tunngasunut sulianut tamanut.

Tamanna isumaqarpoq, Per Vestergaard Pedersen aamma Christina Keis Nielsen naliliisut, Kalaallit Nunaat, Savalimmiut Danmarkilu, assersuutigalugu nunat tamalaat akornanni aalisagartassat pillugit isumaqatiginninniarnerni, tunngaviusumik inatsit unioqqutinngikkaluarlugu, assigiinngitsunik isummersinnaasut.

- Uagut naliliinerput malillugu, tunngaviusumik inatsimmi § 19 ima nipeqartoq, Kalaallit Nunaanni Namminersorlutik Oqartussat suliassaqarfinni Kalaallit Nunaata tigusimasaani nunanut allanut tunngasunut tunngatillugu namminneerlutik aalajangiisinnaasut (sulianut immikkuualuttunut). Taama ittuni Kalaallit Nunaanni Namminersorlutik Oqartussat naalagaaffittut ataatsitut inissisimanngilaq, aamma Namminersorlutik Oqartussat naalagaaffik sinnerlugu iliuuseqanngilaq, allapput.

Naalagaaffiup isumaanit allaanerusoq

Inatsisilerituut marluk namminneerlutik erseqqissarpaat naliliinertik, Naalagaaffiup inatsisilerituuisa nunanullu allanut ministeriaqarfiata arlalitsigut naliliisareernerannit allaanerusoq.

- Nunanut allanut ministeriaqarfiup ilanngullugu nalunaarutigereerpaa Kalaallit Nunaannit Namminersorlutik Oqartussat suliassaqarfinnik akisussaaffimik tigusineranni nunanut allanut tunngasunut tunngatillugu namminneerlutik aalajangiititaasinnaassanngitsut, Kalaallit Nunaanni Namminersorlutik Oqartussat nunanut allanut tunngasunut aalajangiisinnaanngimmata.

- Tassunga tunngatillugu ministeriuneq Lars Løkke Rasmussen maajimi 2017-imi oqarpoq, Kalaallit Nunaat Savalimmiullu kunngeqarfimmut attuumanngitsutut nunanut allanut tunngasunik namminneerlutik suliaqarsinnaanngitsut.

- Tunngaviusumik inatsimmi aalajangersakkat sinaakkutillu isumaqatiginngilagut, ima inissisimammat Kunngeqarfik Danmark naalagaaffiusoq ataaseq ataatsimillu nunanut allanut tunngasunut akisussaaffeqartoq, taamaammat naalagaaffiup iluani nunat immikkuualuttut namminneerlutik suliassaqarfiit tigummisamik iluanni nunanut allanut tunngasunik namminneerlutik suliaqarsinnaanngitsut.

Sillimaniarnermut politikki tiguneqarsinnaanngilaq

Per Vestergaard Pedersen aamma Christina Keis Nielsen erseqqissaapput Kalaallit Nunaata Savalimmiullu nunanut allanut tunngatillugu suliassaqarfinnik tigusisinnaanissaat killeqartoq. Tassa illersornissamut sillimaniarnissamullu tunngasut maannakkutut naalagaaffiup ataaniittussaammata.

Nutaarsiassiissummik suliaqartut Naalakkersuisoqarfiit ataasiakkaat siunnersorpai. Ilanngulluguli erseqqissarlugu nutaarsiassiissutip imarisaanni namminneerlutik naliliigamik, imarisaalu pillugu Naalakkersuisut oqaloqatigineqarsimanngitsut.