Inatsisilerituunngorniat peqatigiiffiat: Nuummi kandidatitut ilinniarfeqartariaqarpoq
Lars Jørgen Kleist siulersuisuni siulittaasunngortoq inatsisilerituunngorniat atuakkat akikinnerunissaannut aamma kandidatitut ilinniarnissamut periarfissaqalernissamut siuttuussaaq.
Inatsisilerituunngorniat Peqatigiiffiata IP-p ataasinngornermi ataatsimeersuarneranut atatillugu Lars Jørgen Kleist siulersuisuni siulittaasautut qinerneqarpoq.
IP tusagassiuutinut nalunaarummi taama ilisimatitsivoq.
Siulersuisunut ilaasortanngortut sinneri peqatigalugit, siullermik Ilisimatusarfimmi taamaallaat bacheloritut inatsisilerituunngorniarnermik neqerooruteqartoqarnerani, siunissami kandidatitut ilinniarsinnaanermut periarfissaqalernissaa sulissutiginiarpaa.
Peqatigiiffiup siunertaani taanna pingaarnersaavoq – tamannalu taperserneqarluarpoq.
- Nuannarutigaarpullu Ilisimatusarfimmi kandidat-inngorniarnissaq takusinnaagatsigu tamaviaarullugu sulissutigineqartoq, tassami ilaatigut inatsisilerituunngorniarnermi immikkoortortami atorfinittussamik qinnuteqartitsinermi ilaatigut atorfinittussap suliassaasa ilagigaat ersarimmat, Lars Jørgen Kleist oqarpoq.
Inatsisilerituunngorniarnermi atuakkat akisuut
Inatsisilerituunngorniat peqatigiiffiata kandidatitut ilinniarnissap nunatsinni neqeroorutigineqarsinnaanissaa pingaartippaa, inatsisilerituunngorniat kalaallit inatsisaannik atuuttunik ilinniartinneqarsinnaassammata, akerlianik Danmarkimi kandidatitut ilinniarnermi kalaallit ilinniartut danskit inatsisaannik ilinniartarmata.
Kandidatitut ilinniarnerup saniatigut inatsisilerituunngorniarnermi atuakkat akikinnerunissaat anguniagaavoq.
- Inatsisilerituunngorniarnermi atuakkat atukkagut akisoorujussuugamik ilinniartuinnaalluni aningaasaqarnikkut annertuumik unammillernarsinnaammat, siulittaasoq oqarpoq, siulersuisullu ilaatigut aningaasaateqarfitsigut imaluunniit tapiissuteqartarfiit allat aqqutigalugit tapiiffigineqarsinnaaneq misissorneqassasoq nassuiaavoq.
Maannakkorpiaq Ilisimatusarfimmi inatsisilerituunngorniartut 50-iupput.