Inatsisileritooq: Nipisattassiissutit pillugit suliami inatsit unioqqutinneqarsimavoq

Nipisattassiisutit pillugit suliami suna ilumoortuunnginnersoq sunalu ilumoortuunersoq politikkerinit malunnartumik isumaqatigiinngissutaavoq, aamma sapaatip akunnerani kingullermi sisamanngornikkut marlunngormallu oqallittoqarnerani tunngavilersuutigineqartut pasilliinerillu kusanaattut atorneqarneranni suliami suna piviusuunersoq paasiuminaattupilussuuvoq.

Apeqqutit qitiulluinnartut ilagaat: Naalakkersuisut Siulittaasuat nipisattassiissutinik qaffaasoqarnerani ikinngumminullu aalisartumut angallamminik attartortitsinermini malittarisassat ilaannik unioqqutitsisimava?

Sermitsiaq.AG-p suliaq pillugu inatsisileritooq oqaloqatigisimavaa.

Pisortat ingerlatsineranni suliassat suliarineqartarnerat pillugu Inatsisartut inatsisaat

Kapitali 2. Suliami peqataasinnaannginneq

§ 3. Kinaluunniit pisortatigut ingerlatsinermi suliaqartoq suliassami aalajangersimasumi peqataasinnaanngilaq,
1) nammineq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnilluinnartuuguni […],
2) taassuma aapparisaa, eqqarlia imaluunniit aappariinnnikkut siulimigut kinguaamigulluunniit siulimiluunniit qatanngutaasigut imaluunniit allatigut qanitaasigut qanitsigisumik qanigisarinnittuusoq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnittuuppat […],
3) […],
4) […],, imaluunniit
5) pissutissaqarpat kinaassusersiorsinnaanngissusia qularilissallugu.
Imm. 2. Suliamili peqataasinnaannginneraasoqarsinnaanngilaq soqutiginninnerup pissusia annertussusialuunniit, suliassap pissusia imaluunniit inuup taassuma suliassap suliarineqarneranut atasumik suliai pissutigalugit isumaqarnanngippat aarleqqutissaasoq suliassami aalajangiinissap soqutigisanut tunnganngitsunit sunnerneqarnissaa.
Imm. 3. Suliassami pissuteqartumik peqataasinnaanngitsoq suliassap suliarineqarnerani aalajangiissanngilaq, aalajangiinermi peqataassanngilaq allatulluunnit peqataassaanngilaq.

NAAMIK Kim Kielsen eqqartuussissuserisoqarfik Poul Schmidt naapertorlugu suliamut attuumassuteqarpallaanngilaq. Taamaalilluniluni Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8, 13. juni 1994-imeersumi § 3 unioqqutissimanngilaa.

Kielsen § 6-imik unioqqutitsisimasoq

Eqqartuussissuserisoqarfiulli Poul Schmidtip nalilersimavaa, Siulittaasup Pisortat ingerlatsineranni suliassat suliarineqartarnerat pillugu Inatsisartut inatsisaanni aalajangersagaq alla unioqqutissimagaa, tassalu § 6.

Suliamut attuumassuteqarpallaartoqarsinnaanermut apeqqusiisinnaasumik pissutsit atuuppata, tassunga ilanngullugu inuttut soqutiginnittoqarpat, pissutsit pineqartut pillugit ilisimatitsisussaanermut pisussaaffeqarpoq - suliamulli attuumassuteqarpallaartoqanngitsoq qularutigineqanngippat tamanna atuutissaanngilaq.

Kim Kielsen ilisimatitsissuteqarsimanngilaq. Angallamminik attartortitsisimanini Naalakkersuisunut ilisimatitsissutigisussaagaluarpaa, tamatumalu kingorna Naalakkersuisut allat suliamut attuumassuteqarpallaarnersoq nalilertussaagaluarpaat.

Kukkunersiuinermut Ataatsimiititaliamit tamanna sakkortuumik isornartorsiorneqarsimavoq. Taamatut sakkortuumik isornartorsiuineq ilaatigut 2015-imi avaleraasartoortassat pillugit kukkunersiuisut misissuinerminni suliamut peqataasinnaannginneq pillugu immikkut eqqumassuteqarnissamik Naalakkersuisunut kaammaattuuteqarsimanerannut attuumassuteqarpoq.

Misissuinermi atortussanik tunniussisoqarsimannginnera

Kim Kielsen suliamut pineqartumut attuumassuteqarpallaanngikkaluarluni, inatsimmi aalajangersakkamik ataatsimik unioqqutitsisimavoq. Tamannali isumaqanngilaq pinerluuttuliorsimaneranik. Tassa tamanna pineqaatissiissutigisinnaanngilaa imaluunniit akiligassiissummik tunineqarsinnaanngilaq.

Pisortat ingerlatsineranni suliassat suliarineqartarnerat pillugu Inatsisartut inatsisaat

Kapitali 2. Suliami peqataasinnaannginneq

§ 6. Kialuunniit pissutsinik § 3, imm. 1-imi taaneqartunik pissuseqartumik ilisimannittup oqartussaaffimmi qullersarisani piaartumik tamatuminnga nalunaarfigissavaa, erseqqilluinnanngippat pissuserisat pingaaruteqanngitsuusut. Ingerlatsinermut oqartussaaqatigiinnut ilaasortat taamaattunik ilisimasaqarfigineqarpata tamakku oqartussaasunut nalunaarutigineqassapput.
Imm. 2. Inuup suliami peqataasussaasorinannginnera taamaassorinannginneraluunniit oqartussaasunit imm. 1-imi taaneqartunit aalajangiiffigineqassaaq.
Imm. 3. Aalajangiiffigineqartussaq suliami peqataasussaasorinannginnermik taamaassorinannginnermilluunniit apeqqutip oqaluuserineqarnerani aalajangiiffigineqarneranilu nammineq peqataassanngilaq, taamaattorli takuuk § 4, imm. 1 aamma 2. Tamannali atortuunngilaq allanut inatsisit naapertorlugit allatut aalajangiiffigineqareersunut.

Kukkunersiuisut Ataatsimiititaliaata nalunaarummini isornartorsiorpaa, eqqartuussissuserisoqarfiup Poul Schmidtip Naalakkersuisullu Siulittaasuata Naalakkersuisoqarfiata allaqatigiittarsimanerisa assilinerannik Naalakkersuisut tunniussiumasimannginnerat.

Pisup ingerlanerani isumaqatigiinngissutaasimavoq, Naalakkersuisut atortussanik Kukkunersiuinermut Ataatsimiititaliamut tunniussisussaatitaanersut.

Sisamanngornikkulli oqallittoqarnerani Inatsisartut Siulittaasuata Vivian Motzfeldtip erseqqissaatigaa, Inatsisartut suleriaasianni malittarisassat erseqqissuummata, paasissutissat ataatsimiititalianut tunniunneqartussaasut.

Naalakkersuisut tamatuma kingorna Naalakkersuisut Siulittaasuata Naalakkersuisoqarfiata eqqartuussissuserisoqarfiullu Poul Schmitsip allaqatigiissimerannit assilisat Kukkunersiuinermut Ataatsimiititaliamut tunniussimavaat.

Tamatuma saniatigut angallat Kim Kielsenip inuussutissarsiutigalugu aalisartumut attartortissimasaa, søfartsstyrelsenimi inuussutissarsiutitut atorneqarnissaanut akuerisaanngilaq. Tamannali eqqartuussissuserisoqarfiup Poul Schmidtip Kukkunersiuinermulluunniit Ataatsimiititaliamit suliarineqarsimanngilaq.