Inatsisileritooq: Piiavinni ingerlatseqatigiiffiit maleruagassaanik allanngortitserineq unioqqutitsineruvoq

Nalunaarummi uissuumminartumi nunatsinni inatsisilernermik suliffeqarfiit nuimanersaat, Nuna Law, maleruaqqusat nutaat, piiviaanni ingerlatseqatigiiffit ajornartorsiuteqarfigilersinnaasaat pillugit isornartorsiuipput.

Avataaniimmi suliartortut piianerup iluani sulissatillugit sulisinnaanermut akuersissummik pigisaqarnissaat manna tikillugu piumasaqaataaneq ajorpoq.

Maleruaqqusallu nassuiaataat tassanngaannartumik maanna allanngortinneqarput, tassa piiaanermut atuutsinneqarunnaarluni taamaallaallu misissuinernut paasiniaanernullu taamaallaat atuutsilissalluni, Nuna Law nutaarsiassiami, inatsisilerituup Peter Schriverip atsiorsimasaani, allappoq.

Inatsimmi piiaanerit misissuinerillu assigiinngissuteqanngitsut

Sulisinissaanermut akuersissummik piumasaqaateqarneq aatsitassanut inatsimmi ilanngunneqarsimanngillat, misissuinermi, piiaanermi allatigulluunniit suliaqarnermi atuutsinneqassanersut inatsimmi erseqqissarneqarsimanngilaq. Misissuinernik piiaanernillu suliaqarnerit manna tikillugu ilanngunneqarneq ajorput. Tamanna Udlændingestyrelsenip 2011-mi Naalakkersuisunut allagaani allassimavoq. Suliartortut sivisunerpaamik qaammatini pingasuni nunamiinnissaat kisiat piumasaqaatigineqartarsimangaluarpoq.

- Paasiniaanerni / piiaanerniluunniit suliaqarnermi avataaneersut sulisinnaanermik akuersissummik pigisaqarnissaat piumasaqaataanngitsoq erseqqissarneqarpoq, Nuna Law nutaarsiassiami allappoq.

Udlændingestyrelsenip allagaani pineqartut manna tikillugu inatsip nassuiaataanut atuutsinneqarsimapput.

Suliffeqarnermut naalakkersuisoqarfiup allannguuteqarnissaq qinnutigisimavaa

Nuna Law naapertorlugu maleruaqqusanut nassuiaatit nutaat Danmarkimi Udlændingstyrelsimut attuumassuteqanngillat, kisiannili Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfiup saaffiginnissuteqarsimanera tunngavigineqarpoq.

- Inatsimmi tunngaviit amigaatigineqartut

Peter Schriverip allannguutit kisiisa paasiuminaatsinngilai, inatsimmullu naapertuutinngitsutut nalilerlugit.

- Naliliinerput naapertorlugu inatsisitigut tunngaveqanngilaq, nalunaarutigineqareersimasunulli akerliulluni, taanna nutaarsiassiami allappoq.

Sukaterinerit pingasut

Maleruaqqusanik allannguutit pisortatigoortumik suli nalunaarutigineqarsimanngillat. Nuna Law-llu aatsitassalerinermik ingerlatalinnut inatsisilerituutut suliaqarnerminni allannguutissat paasisimagunarpai.

Immikkoortunilu marlunni maleruaqqusat aamma tassaanngaannartumik allanngortinneqarsimapput. Siullertut immikkut ilisimasallit pineqalissapput tullertulli pineqartup suliani qaammatit pingasut ingerlanerini naammassereersimassallugit. Taakku tamarmik Udlændingestyrelsenip 2011-mi allagaani ilanngunneqarsimanngillat.

IBA-mik piumasaqaatit akulerunniarneqarpasittut

Suliffeqarnermut, Niuernermut Nukissiuuteqarnermullu Naalakkersuisoqarfiup sooq maleruaqqusat allanngortinneqarnissaat Udlændingestyrelsenimut kissaatigisimaneraa, Peter Schriverip nassuiaatissaqartinngilaa.

- Suliffeqarnermut, Niuernermut Nukissiuuteqarnermullu Naalakkersuisoqarfik sooq taamatut inissinnera paasiuminaatsipparput, Naalakkersuisoqarfillu, IBA-mik isumaqatigiissummik akuersissummillunniit imaqarsinnaasumi, nunaqavissunik sulisoqarnissaat sulisinnaanermullu akuersissummik piumasaqaatinut apeqqutit akulerunniarneqarpasipput.

IBA-mik isumaqatigiissut piiaavimmik aallartitsisinnaanermut piumasaqataavoq. Piiaavimmi kalaallit sulisorineqartut amerlassusissaat najugaqartullu suliffimmik misiliisinnaanissaannik periarfissaqartitsinissamik piumasaqarnermik imaqakkajuttarpoq. Tassanilu inatsisilerituup paasinnittaasia naapertorlugu, IBA-mik isumaqatigiissummi nunani allamiunut inatsimmi peqqussutit atornerlunniarneqarpasipput.

- Avaataaneersut sulisinnaanermik akuersissuteqaratik suliartortartut killilersorneqarnissaat kissaatigineqarpasippoq, Nuna Law nangilluni allappoq.

Naak Nuna Law isumaqaraluartoq inatsimmi maleruaqqusat tunngavissaqanngikkaluartut, piiaavinni ingerlatseqatigiiffiit maleruaqqusat nutaat annertunerusumik nassuiaateqarfiginissaata tugaanut malinninnissaat, eqqartuussiserisut innersuussutigaat.

Nuna Law maleruaqqusat erseqqissarneqarnissaat anguniarlugu danskit integrations naalakkersuisoqarfianut saaffiginissuteqarsimavoq.