Inatsisilerinermi atuagaq nutaaq: Nakkutilliisut Sermersuup inissaqartitsiniarluni periusaanik atorunnaarsitsisinnaanngillat

Kalaallit Nunaanni kommuninik aqutsinermi inatsisitigut malittarisassat pillugit kommunit aqutsinerannut ilinniutitut atuakkiorsimasoq isumaqarpoq, Namminersorlutik Oqartussat kommuninik nakkutilliisui inissaqartitsiniarluni suliamik suliarinninnerminni arlalitsigut ingasaassisimasut.

Atuakkami "Kommunestyret i Grønland" atuakkiortup inatsisilerituullu Morten Engbergip Namminersorlutik Oqartussat nakkutilliisui Nakkutilliisuutitallu inatsimmik arlalitsigut malinnissimanngitsut oqaatigaa.

Morten Engberg ukiuni kingullerni marlunni kommunit pisinnaatitaaffii pillugit Ilisimatusarfimmi ilinniartitsisimavoq, tamannalu pillugu ilinniuteqanngimmat aalajangersimavoq, Kalaallit Nunaanni kommunit aqutsinerat kommuninillu nakkutilliisarneq pillugit inatsit naapertorlugu ilinniutissamik allagaqarniarluni. Morten Engberg Danmarkimi kommunit aqutsinerat pillugu assigusumik siusinnerusukkut atuakkiorsimavoq aamma Danmarkimi ombudsmandeqarnermut inatsit pillugu atuakkioqataasimavoq.

Naliliineq: Suleriaaserineqartoq atorunnaarsinneqarsinnaannitsoq

Morten Engbergip atuakkiamini uissuumminarnerpaatut naliliisimanera tassaagunarpoq, Nakkutilliisuutitat Kommuneqarfik Sermersuup inissaqartitsiniarluni periuserisimasaanik atorunnaarsitsisimanerat inarsisinik unioqqutitsinerusimasoq.

Kommunip inissianik namminersortunit attartoriarluni innuttaasunut attartortitseqqiisarnera Nakkutilliisuutitat ulloq 19. november 2020 atorunnaarsippaat.

Nakkutilliisuutitalli kommunalbestyrelsip, aningaasaqarnermut ataatsimiititap ataatsimiitalluunniit ataavartup aalajangiussaannik taamaallaat atorunnaarsitsisinnaapput, tassa suleriaatsimik atorunnaarsitsisinnaanngillat, atuakkiorsimasoq taamatut naliliisimavoq:

- Aalajangiunneqarsimasumik atorunnaarsitsisinissamut pisinnaatitaaneq suleriaatsimik kommunimit malinneqartumik atorunnaarsitsisinnaatitaanermit ingasannerulaarpoq, Morten Emngberg allappoq.

Oqaaseqaatiliorsimasinnaagaluartut

Inatsisilerituup tamatuma saniatigut oqaatigaa, Nakkutilliisuutitat suliamik suli suliarinneqajaratik inissaqartitsiniarluni periuserisimasamik atorunnaarsitsisimasut:

- Ilanngullugu maluginiagassaavoq, Nakkutilliisuutitat ulloq 19. november 2020 atorunnaarsitsinissamik aalajangiisimanerat, Nakkutilliisullu suliamik aatsaat 2021-mi novembarip 9-ani 22-anilu aalajangiussaqarsimanerat. Oqaatigineqareersutut Nakkutilliisuutitat sulianik atorunnaarsitsinissamik aalajangiisoqartussaatillugu sukkasuumik suliaqartussaapput, Morten Engberg allappoq.

Nakkutilliisuutitat qanoq qisuariartariaqarsimanerannut atatillugu Morten Engbergip Sermitsiaq.AG-mut nassuiaatigaa, nammineq isummani malillugu Nakkutilliisuutitat Kommuneqarfik Sermersuup inissaqartitsiniarluni periuserisimasaa pillugu pituttugaanngitsumik naliliisimasinnaagaluartut. Kommunip periuserineqartoq inatsimmik unioqqutitsinngitsoq aalajangiussimaannarpagu, Nakkutilliisuutitat periuserineqartup inatsimmut naapertuutinnginneranik uppernarsaaniartussaapput.

Ingerlatsisimaneq isornartorsiorsinnaanngikkaa

Nakkutilliisuutitat isumaqarunik periuserineqarsimasoq inatsimmik unioqqutitsinerusoq, kommunalbestyrelsimi ilaasortat suliamut akisussaasuusut pinngitsooratik pillaatisinneqarnissaat piumasarisimasinnaagaluarpaat, tamatumalu malitsigisinnaasaa tassaavoq, kommunalbestyrelsimit Naalakkersuisut eqqartuussivimmut sassartinneqarnerat, illuatungeriit aaqiagiinngissutsiminnik eqqartuussivitsigut aaqqiissuteqartussanngorlugit.

Morten Engbergip ajornartorsiutitut allatut isigisaa tassaavoq, Nakkutilliisuutitat suliamik alajangiinerminnut atatillugu borgmesterimik immikkut isornartorsiuinerat. Engbergip oqaatigaa, Nakkutilliisuutitat kommunalbestyrelsimut isornartorsiuillutik oqaaseqarsinnaatitaanerat qularnartoq, matumunngalu atatillugu kommunalbestyrelsimi ilaasortaq aalajangersimasoq pineqartillugu suli qularnarnerusoq. Nakkutilliisuutitat aamma kommunimi ingerlatsinermut isornartorsiuinissamut pisinnaatitaaffeqanngillat. Akerlianik Ombudsmandi kommunalbestyrelsimut kommunilluunniit ingerlatsineranut isornartorsiuinissamut pisinnaatitaaffeqarpoq.

Morten Engbergip isornartut siuliani pineqartut saniatigut aamma apeqquserpaa, Nakkutilliisuutitat Kommuneqarfik Sermersuumut ornigullutik nakkutilliiartorsinnaanerat.

Isumaqatigiissuteqarnikkut taamaallaat nakkutilliiartorsinnaasut

Naalakkersuisoqarfinni nunamut namminermut immikkoortortaqarfik, Nakkutilliisuutitanut allattoqarfiusoq ornigulluni nakkutilliiartorsimavoq, Nakkutilliisut isumaqarsimammata kommunimit suliamut atatillugu uppernarsaatigut tunniunneqarusunngitsut. Morten Engbergili naapertorlugu, Nunamut Namminermut Immikkoortortaqarfik Nakkutilliisuutitallu isumaqatigiissuteqarnikkut aatsaat kommunimut ornigullutik nakkutilliiartorsinnaapput.

- Ombudsmandi ombudsmandimut inatsimmi § 16 naapertorlugu oqartussanut, tassunga ilanngullugu kommuninut ornigulluni nakkutilliiartorsinnaavoq, inatsimmili allassimasoqanngilaq Nakkutilliisuutitat imaluunniit Nunamut Namminermut Immikkoortortaqarfik taamatut pisinnaatitaaffeqartut. Kommunimilli isumaqatigiissuteqarnikkut nakkutilliiartortoqarsinnaavoq.

Kommuneqarfik Sermersuumi inissaqartitsiniarluni suliap ingerlanneqarnera tamakkerlugu Naalakkersuisut nakkutilliisui nakkutilliisuutitallu tamarmik immikkut eqqartuussissuserisumik suliamut naliliisitsisarsimapput. Nakkutilliisut Nakkutilliisuutitallu suliamut atatillugu iliuuserisimasaat pillugit Naalakkersuisut Namminersorlutillu Oqartussat nakkutilliisui Sermitsiaq.AG-mit oqaaseqartinniarneqarput.

Inissaqartitsiniarneq pillugu suliaq paasisaqarfiginerusinnaavat, uani.